Battalion Commander telh in ralkap 27 kan tlaih hna tiah KNU nih a thanh
The Chinland Post | 2022 March 13 – Karen ram, Mutaw peng March 11 kahdohnak ah battalion commander telh in SAC ralkap 30 hrawng tlaih an si tiah Papun peng thawngzamh nih March 12 ah a ṭial.
March 11 ah Mutaw peng, Maewai chung ah eidin phorh dih in a rak kir mi SAC ralkap kekal battalion- 97 cu Karen National Liberation Army (KNLA) le phufonh hna nih March 11 ah an kan hna i SAC ralkap 27 a nung in kan tlaih hna tiah a langhter.
An tlaihmi hna chung ah battalion commander pahnih, major pakhat an i tel i ralkap 11 nih hliamhma an tuar tiah theih a si.
Karen National Union (KNU) i Foreign Affairs Officer Pado Saw Taw Ni zong nih thil fiang cu theih a si lo nain an tlaihmi hna chung ah rian ngan a tlaimi pawl an i tel tiah RFA ah a chim.
Cun, an tlaihmi hna pawl hi KNLA battalion 5 nih thong an thlak hna tiah a chim fawn.
Kahdohnak chung in RPG 7 zuun 2, motar 4 telh in hriam le kuan tampi KNLA nih an chuh khawh hna i tangka sing 30 zong kan lak khawh tiah a thanh.
A luancia December 30 zong ah battalion commander telh in SAC ralkap 7 cu Laykaykaw hmunhma ah hriam thilrii he kan tlaih khawh hna tiah KNLA nih a thanh.
About The Author
