Biaknak Lei Tel In Zei Tuah Paoh Ah Nawl Hal Tak Ding In Mindat Penguk Zung Nih Nawl A Chuah
TCP-Thantlang| 2019 January 31| Chin ramkulh thlanglei Mindat khua penguk zung nih January 24 ni thok in Biaknak lei puai tel in INGO/NGO hna nih Training, Meeting tibantuk tuah hlan ah ahlankan zarh hnih aa duh ah Chin ramkulh cozah sin nawl hal ta i nawlpek hnu lawngah tuah khawh a sinak kong penguk zung nih nawl a chuah tiah kan theih.
Nawl an chuahmi chungah; ‘Training tuahnak nawl hal ding, sok/nawl halnak ca a chiatu nih biakamnak tuah ding, Training cawnpiaktu i a konglam tlingtein tial ding, tlangtar a konglam, Training background tial chih ding, a kai kho ding minung cazin, khuabawi le palek theihpinak ca, tuah tik a ni le a caan tibantuk tling tein ahlankan zarh hnih aa duh ah cozah zung ah nawl nan hal hma sa lai’ tiah Mindat khua penguk zung nih nawl a chuahmi kongah khuami pakhat nih CHRO sin ah ca a kuat hna.
“Khuate pakhat ah nikhat hnih chungte Training tuah duh ah khuabawi le palek theihpinak ca vun lak ding, Mindat khua ah vung kal than i Training tuah hlan zarhhnih aa duh ah nawl hal than ding a si ah cun khuate in Mindat khua tiang Cycle hlan man Ks. sing 1 kan pek, cu hmanh cu an duh maw duh lo a si rih. Cucaah Training kongkau ah anmah duhning in khiahpiak awk a tha lo mi a si” tiah khuami ca thathnemnak riantuantu a si mi pakhat nih a chim.
“Chin ramkulh cu a sifak bik ram pakhat a si caah lam le sul zong a that lo pin ah Cycle hlan man zong a fak tuk i khuabawi theihpinak ca zong lak a har tuk. Pehtlaihnak Phone line zong a that lonak khua te in khuabawi theihpinak ca lak duh zongah ahlankan in phone chawnh awk a tha hui lo. Ni tlawmte Training tuah ko ding i Chin ramkulh cozah sin i nawl va hal ta ding cu a si kho lomi a si. Khua ca i riantuantu hna hi mirum, mi lian kan si lo pinah khualtlawn le a caan cu tangka tampi in kan caw kho lo. Mah nawl an chuahmi hi mizapi zei an kan rel lo a si” tiah a cunglei upa nih a chim chih.
Cu nawl an chuahmi chung thiam ah Chinram kulh chung ummi pengkomh, Myone chungah Buddhist, Khrihfa, Hindu, Islam piaknak kongkau ah inn sak, remh tibantuk tuah duh ahcun Naypyitaw Council he aa pehtlai mi ramthen le ramkulh cozah nih nawl pek hnu lawngah riantuan ding tiah Biaknak le nunphung lei kongkau Minnistry zung lei nih ca thanh an chuah.
Ref: CHRO
About The Author
