Bogyoke Aung San Cu Independence A Kan Lakpiaktu Asi Caah A Milem Kan Ngeih A Herh: Pu Zo Bawi

0

Salai Ngun San Aung| 2018 July 26| Myanmar rampi zalonnak (Independence) a kan lakpiak tu cu Bogyoke Aung San a si i Martyr ni kan tuah tikah lu khun in upat pek ding amah airawl tu an um hlei lo, vawlei hmunh chung martyr day cu tuah ding kan si fawn caah Bogyoke milem kan ngeih cu a herh ko tiah Chin ramkulh hluttaw Speaker Pu Zo Bawi nih a chim.

“Bogyoke milem kan tuah lai timi hi biachahnak kan ngei rih lo. Asinain a tu te bak kha upa cheukhat he Khuhsilo bo ah ekah 5 kan va zoh. Kan zoh ti tikah kan fehter ti nak a si lo. Cun pangpar dum tuahnak caah kan zoh mi a si i a herh kan ti ahcun Bogyoke milem cu kan tuah te hnga, thil a fiang mi cu a um rih lo. A tuahnak tangka cu Sipin nih pangpar dum tuahnak caah tangka an hal lai i cu chung in a hleivuang mi in tuah a si hnga. Cozah tangka in tuah a si hnga lo” tiah The Chinland Post ah July 25 ah a chim.

Hi kong ah CNDP chimrelnak nawl ngei Salai Ceu Bik Thawng nih hitihin a chim. “Pakhatnak ah Gen. Aung San kha NLD nih an party ramkhel hlawknak ah an hman, an zuar caah a limhang an zorter, belmang an neh a si. Kachin, Kayah le Naga tepawl ah zeitin chimceih a ton nan hngalh ko. Rakhine ram hna ahkhin an AS milem an chia ngam maw? Pahnihnak ah Aung San le kan miphun kong hi rihma kan fian a herh. Pumpak in kan upat dihmi a si ko. Asinain Aung San le Chinmi cu federal kong ceihnak ah Panglong ah kan i tong– cu lawng cu kan itheihnak le kan i pehtlaihnak a si. Zeidang Independence le zei ee ram hruaitu a si ee ti pawl kha cu voitam kan chim cang i fianter tuk ahhin amah huat ah an kan ruah i a tha lo. Aung San a thih tiang 1947 July 19 tiang ahhin Chin miphun hi atu Myanmar ram timi ahhin kan ke hnih in kan lut rih lo, 1948 kum hnu lawngah kan luh taktak hi a si. Amah he federal hnatlaknak kan sermi kan hluhchuah khawh thai a si ahcun a lem zong cu kan chumtual ah ser cio ding si ko. Nain nihin ni ah kan ceih lio lawng a si rih. Federal hmanh an kan pek duh lo ahcun aziah dah Kawl he cun hmunkhat ah kan um peng huam lai? Soviet Union bantuk in anmah Kawl lila hi Myanmar ram chungin an chuak lai lo kan ti kho lo. Cu tiang cu ruah a hau. Cu tikah Lenin milem bantuk in hrawh lo awk tha lo hna a si sual ding kha a tha lo. Kan hmailei kong zeihmanh a fiang rih lo. Remdaihnak ceihmi zong a tluang lo ngai, atu hi. Cucaah tuah hnudung ding kha tuah hmasa ding si lo. Chim duhmi cu hi pawl hi cu federal ngah hnu ah tuah dingmi a si. Dohlennak kan lim rih lo. Kawl he miphun khuakhannak covo kongah kan i dawr cuahmah lio si. Pathumnak ah hi milem tuah duh pawl nihin kan miphun hruaitu pawl le kan pipu pawl kha an lungkil ah an ruat ve dek maw. Nawlngeitu si ninglaw Hakha khuachung i lamthlur nganbik khi Boyoke Lam ti loin Chin kan pa le min ka sak hnga. Miphun dang hruaitu pawl min le milem kha cu pakhatnak ah ka chia hnga loh.”

Pu Zo Bawi nih, “hi kong ahcun mizapi ruahnak lak zong a herh ah kan ruat lo. Tuah ding ti zong cu fehter a si rih lo i committee hmanh kan ser rih lo caah chim ding a um lo. Cun mizapi lei kap in duh lonak langhternak um sual sehlaw tah timi kong zongah tuah ding hmanh biachah a si rih lo caah ruah awk a herh ah kan ruat lo” tiah a chim.
Chin Youth Organization President Salai Van Cin Thang nih, “hi kong cu tu lawng kan theih i fak deuh in ruah le i ceih a herh mi a si. Keimah pumpak ruahnak in cun pangpar dum ahcun milem cu khuazei ram paoh ah an va chiah cio ko i kanmah zong cu chiah ve ah a poi lem maw ka hei ti. Pangpar dum siloin lamton le hmun dang dang ti bantuk i ciammam in va chiah tu khi cu a herh ah ka ruat ve lo” tiah TCP ah a chim.

CPTP in Pu Tluang Ceu nih, “hi kong cu ramkhel he aa pehtlai mi a si caah tam pi chim ka duh lem lo. Khuanu khuapa rian ti bantuk deuh ah khin ka ruah. Aung San cu zalonnak a kan lak piak tu tiin kan hei ruah i upatnak kan pek lengmang cang mi a si ko caah a milem chiah kha a poi tuk lem maw ka ti. Asinain kha bantuk lei upat nak in siloin party ramkhel in an kal pi i an tuah mi tu hi cu ruah awk a um ngai ngai, ka uar deuh lo” tiah a chim.

Hakha Khua nu/pa Pu Ral Kham nih, “Aung San milem kong cu chim len ding kan ngei lem lo. Asinain pangpar dum tuahnak ah kan va zoh an ti mi Khuhsilo bo khi Khua nu/pa nih cozah sinah kan hal zungzal cangmi a si. Khua nu/pa cu cozah hngalhpinak a ngei mi nan si lo caah Sipin min in kan in pek hna lai i a tuan tu cu nanmah duh ning tein nan tuan lai an kan ti. Nikum ah khan Khuahlun pawl he kan va thianh cang. Cun kan hnu thla ah khan Pu Thla Hre a zung ah kan len i pangpar dum caah kan tuah lai nan ti zongah kanmah duhnak tel loin nan tuah hrim hrim hnga lo tiah kan chimh. Khua nu/pa nih cun City Tower sak kan duh. A si khawh ahcun Lai-inn tiang sak kan duh mi a si” tiah a chim.

Hi kong cu buai ding a um lo. Khua le ram caah a si. Khuapi tlungtlang a tlin deuh nak ding le kan cozah lungthin kan lak khawh deuh nak ding ah a herh tiah ka ruah. Zeiti khuhsilh le hip nak caah a si hrim hrim lo tiah Pu Zo Bawi nih a chim.

NLD cozah nih kum hnih le cheu fai rian an tuan caan chung ahhin Myanmar ram chung ah Aung San milem 15 an phun cang i nai te ah Kachin ramkulh Mitgyina khuapi hna ah cun Aung San Milem an an phun mi cu a ho si ti hngalh lomi nih tinbawsi an toih caah buainak nganpi zong a chuak. Kaya ramkulh le Naga zong an ram ah Aung San milem phun an duh lo caah buainak le lamzawh in duh lonak langhternak tiang a chuak. Thantlang zongah Sipin Committee nih tuah dingin cozah sinah an hal nain mizapi nih an duh lo caah le tuah ding tender a ngahtu nih an khirh than hna caah sipin committee nih Chin ramkulh cozah sinah an ap than i nanmah nih a rem nan ti ning in tuah uh tiah an ti hna tiah kan theih. +++

About The Author

Na ruahning rak langhter ve.. (Leave a comment)

%d bloggers like this: