Bogyoke Aung San MILEM Kong Online In Mizapi Hmuhning Kherhhlainak

TCP-Editorial| 2018 April 26| Bogyoke Aung San MILEM kong Online in mizapi hmuhning kherhhlainak; Mi tam deuh nih Aung San MILEM Sak an duh lo Thantlang sipin nih sing 300 dih in Bogyoke Aung San milem (pangpar dum telh in) kan sak lai tiah Tender an uah. Thantlang sipin biachahnak cung ah Thantlang khuami, zatlang bu pin ah Chin ramkulh hmundan in lungtlin lonak ceih cio a si. Mi tampi nih Bogyoke Milem sak an duh lo bantuk in a duhmi tampi an rak um ve.

Laimi zatlang biaruahnak ah a buai ngaimi le a linsa tukmi a si caah The Chinland Post nih mizapi duhnak kherhhlainak kan tuah. Mee thlaknak in kan tuah. Zarh khat chung ah Online in minung 846 nih an thlak. Mee thlaknak ah biahalnak cu “Thantlang ah Bogyoke Aung San MILEM tuah a herh maw, na duh maw?” ti a si.

Ka duh, herh ko tiah minung 274 nih mee an thlak. A herh lo, ka duh lo tiah minung 572 nih mee an thlak. Cucaah Thantlang ah Bogyoke Aung San milem tuah a duhmi zatuak 32 (32%) lawng an si. A duh lotu zatuak 68 (68%) an si caah Thantlang ah Bogyoke Aung San milem ser duh lonak lei nih a tei.

Zei ruang ah dah tamdeuh nih an duh lo? Aho pawl dah a duh lomi an si?
Internet in Facebook le zatlang bu biaruahnak ah Bogyoke Aung San milem tar an duh loning hi aa lo cio lo. Cheukhat nih sing 300 in tuahmi MILEM nih zeihmanh a kan tha hnem lai lo. Thanchonak ca tu ah sing 300 cu hman deuh ding a si an ti. Cheukhat nih sipin nih mizapi hnathlaknak lak lo in anmah duh in khua an khan. Zaukphung an zulh lo caah a si tiah an ti ve. Cheukhat nih hi milem phen ah ramkhel tampi aa thup. Kawlmi nih dawpdolhnak a si. Thantlang ah Pu Lal Luai tibantuk paraltha le miraang a dohtu kan ramkhel hruaitu an um ko. Cu bantuk pawl tar lo in Aung San milem tar kan herh lo. Aung San an tar ahcun Chinmi ramkhel kan pa le zong tar chih hna seh ti an chim. Cheukhat ve nih biaknak min in Milem tbk. cu tar awk a si lo. Khrihfa zumhnak nih a pommi a si lo tiah a timi mi tlawmte an um ve. Zei a si paoh ah hmuhning le duhning le duh loning aa lo cio lo nain Thantlang ah Bogyoke Aung San milem tar lo ding cu nihin tiang ah Thantlang khuami duhnak le mizapi duhnak a si rih.

Thantlang ah sipin nih Bogyoke Aung San milem tuah an timhmi nih tampi fimcawnnak le a langhtermi a um.

1. Zaukphung (Democracy) cu mizapi duhnak in i hruai phung a si. Sipin nih mizapi hnathlaknak lak lo in biakhiahnak an tuah colhmi cung ah mizapi nih an doh tikah mizapi hnatlaknak tel lo in riantuannak a hlawhtlin khawh a har zia a langhter.
2. Kan khua kan ram le kan miphun hruainak ah miphun dang nakin kanmah Chinmi kan i upat le sunhlawi a herh deuhnak kong tampi fim a kan chimh.
3. Kawl miphun dawpdolh kan duh lo timi a langhter. Kawl ramkhel nih chilhmi si lo in kanmah Chin miphun lungput (Nationalism) a biapit deuhnak a langhter.
4. Zaukphung ah zalongte in chim khawhnak nawl kan ngeihning a langhter. Cu pin ah ruahnak aa danning i upat a herhnak le ramkhel Party le cozah le zatlang kar ah pehtlaihnak kan i ngeih a herhning, pehtlaih thiam a biapitning a langhter.

Zaukphung phung a zulmi le fekte in aa tlaihmi nihcun mizapi thimmi cozah le mizapi thimmi Sipin nih khua thanchonak rian ah siseh, khua he aa pehtlaimi rian kongkau ah mizapi asiloah mi tamdeuh nih duhnak hngalh ko bu in mizapi kha zeirel lo in hramhram in an tuah chih awk a si hrimhrim lo. Cucaah, mizapi duhnak aw-aan a ngai i a kan tuahpiaktu Chin cozah tha le Chinram Sipin committee tha si hraam ko hna seh.

Editor| 2018 April 26|

Na ruahning rak langhter ve.. (Leave a comment)

%d bloggers like this: