Bogyoke Aung San Zuk Lem Tuah Hi NLD Policy A Si Lo
TCP-Online| 2018 July 5| NLD cozah an kai hnu in Kawlram chung hmun kip ah Bogyoke Aung San zuk lem an sermi hna hi NLD Party nih a fialmi a si lo tiah NLD party in chimnaknawl ngeitu Dr. Myo Ngunt nih a chim.
Bogyoke Aung San zuk lem tuah cu khuami hnatlak hnu lawng ah tuahmi a si i NLD policy hrim zong a si lo tiah Dr. Myo Ngunt nih cun a chim.
Kawlram chung- a bikin tlangcung mi umnak hmun pawl ah Aung San zuk lem an tuahmi kong khuami hna nih an duhlonak biatakte in an langhter i nai tan July 3 ni zong khan Kaya ramkulh Loikaw ah duhlonak a langhtertu hna zong palek nih tlaih in ahmuh an tuah hna. Hi kong hi khuami cheukhat Aung San a uartu nih anmah le duhnak le tangka in Bogyoke zuk lem tuah an timh i cozah sin zong an nawl hna. Nain, cheukhat nih an duh ve lo tikah cozah tiang he buainak zong a phan chih.
Duhlotu hna nih an chim ning cun, Bogyoke Aung San nih hin Kawlram ramkomh zong a hrawh mi a si tiah an chim ve i amah Bogyoke zuk hrim ser an duh lo. A bikin tlangcung mi pawl umnak hna ah.
Hlan ralkap chan ah an rak hnon pengmi Aung San kong cu tu NLD cozah nih biatak tein tharchuah an timh cuahmah lio ah tlangcung mi tam u deuh nih cun anmah le ram ah Aung San zuk lem hrim chiah an duh lo.
Kawlram ramkhel lei ah thiamsang pakhat U Maung Maung Soe nih cun, tu bantuk in NLD a uartu le Aung San zuk lem lawng a duhtu hna nih an duh ning lawng an kalpi peng ko a si ahcun a ralaimi 2020 ramkomh thimnak ah NLD nih hin tlangcung hmun tampi ah thutnak zong an sung kho tiah a chim.
Ref; BBC
About The Author
