“Brain Game” nih thluak a tthatter maw?

Roro Fambawl

πŸ”΅ Thluak tthatnak game le apps sertu pawl nih: Hi game cu thluak lei thiamsang hna le hlethlaitu hna he i bawmhnak in sermi a si i thluak a tthatter deuhtu a si, tiah an chim ttheo. Cun mi tampi zong nih kan theih ttheomi cu game nih thluak tthatnak a bawmh ti hi a si.

πŸ”΄ Kum 2014 lio ah khan thluak lei hlethlaitu le psychologist i bawm in minung 72 nih game sertu hna nih an chimmi an chimning in a si le si lo zohfelnak an tuah. A phichuak an hmuhmi cu game le apps pawl nih hin game celh thiamnak cu an pek ko, asinain fimnak (smart) lei siseh, serchuah thiamnak (creative) lei siseh, luhlinhnak (concentrate) lei siseh, cun cinken khawhnak (memory) lei siseh a bawm lo, ti a si.

πŸ”΄ Kum 2016 ah hlethlaitu thar an hun chuak ve i, hmasa deuh thiamsang pawl nih a phichuak an hmuhmi kha an palh e, tiah an ti. Thluak tthatnak ca sermi game thar pawl nih hin thluak lei a bawmh ko tiah an ti ve. Hlethlaitu phu hnih, thiamsang veve, a phichuak an hmuhmi biafun aa dang.

πŸ”΄ A hnu ah thluak lei hlethlaitu phu thar an hun chuak tthan. Voikhat ah za lakin biafunnak tuah khawh dingin an i zuam. Tuan deuh i thiamsang hna phu hnih nih an tuahmi nak ttha deuh, kau deuh le tling deuh in an tuah. A phichuak an hmuhmi cu: Game nih naa celhmi game le mah game he aa lomi thil tuah thiam deuhnak cu an pek, asinain thluak tthatnak; tahchunnak ah cinken khawhnak (memory) ruah-hngalh khawhnak (intelligence) le serchuah thiamnak (creative) tibantuk a bawm lo, ti a si.

πŸ”΅ A donghnak phu nih a phi an chuahmi biafunnak nih fiang tuk in a langhter caah US cozah nih thluak tthatnak game (brain games) a sertu phu tampi cu a dik lomi nan chim tiah tangka a million in dan a tat hna.

πŸ”΅ Classic games; Sudoku a si ah, cun crossword tibantuk zong a si ah naa celh ahcun soduku le crossword celh thiamnak cu an pek ko lai, nain thluak tthatnak lei a dang an tthathnempi lo, tiah hlethlainak nih a langhter fawn.

———–
Cherhchan:
Simons DJ, Boot WR, Charness N, Gathercole SE, Chabris CF, Hambrick DZ, etc..
– Do “Brain-Training” programs work? Psychol Sci Public Interest. October 2016;17(3):103-86.

Ole Petter, H. (2019) Sterk Hjerne – med aktiv kropp. Oslo Kagge Forlag AS

Theihternak: Catialtu hnatlak le lungtlin nakin zapi caah santlaihnak a um hnga maw timi ruahchannak he, The Chinland Post nih kan hun thlah chinmi a si. ~ Editor

Na ruahning rak langhter ve.. (Leave a comment)

%d bloggers like this: