Breaking News: Tio Ah Minung Pakhat Ti A Paam

0

City Hunter| 2018 June 26| Myanmar ram in India ramri lei ah cawkanh in sipuazi a tuahmi minung pakhat cu CNF/CNA umnak Camp Victoria pawng Tio Tiva pi ah ti a paam. Atu hi a ruak an kawl len  ko nain ti hrat a chiat tuk caah an hmu kho rih lo tiah Thantlang peng, Tlanglo khuami sin in The Chinland Post nih thawng kan theih.

Hi kong he  pehtlai in Tlanglo ummi khuami Chan Maung Pa nih, “June 25 ah kan khua a palmi caw hruaitu hi minung 3 an si. Pakhat hi Awite Pa ah kan ruah. Cucu, Awi Te pa ti lawng ka hngalh i khuami nih Joseph Van Tha Lian a deuh lo maw a kan ti. Cucu Tio tiva ah ti in a paam i a thi tiah tu zingka ah thawng kan theih. Khuami nih an va zuan hnawh colh. Atu nai te suimilam 3:00 tluk ah khan Tio lei in a rak kaimi nih Joseph Van Tha Lian nan timi cu a si lo, Kawl Pa a si, a  min cu kan theih lo a kan ti” tiah The Chinland Post ah a chim.

“Chun suimilam 2:00 tluk ahkhan Tlanglo khuami upa pakhat nih Joseph Van Tha Lian hi June 25 ah Tlanglo ah ka hmuh. Amah te lawng, cawruun he ka hmuh. A chawnh zong kan i biachawn. A cawkanhmi hi caw 8 hrawng an si. Tlanglo in Tio tiva lei a panh. Tu chun ah khan cawkaanmi ti ah a paam. Caw kha ti raal i a chuahpi hna nakah amah hi tiraal tiang chuak kho ti lo in ti ah paam dawh a si tiah thawng a kan thanh. Cucaah, June 25 ah amah lawng cawkaan ka hmuhmi  Joseph Van Tha Lian a si hnga maw ti ka ruat. Joseph Van Tha Lian hi a min lawng ka hngalh i a khuami le a chungkhar ka hngalhpiak hna lo. Amah hna a si sual ahcun a hngalmi nih a chungkhar pehtlaih piak colh a herh a kan ti” tiah Hakha um Tlanglo khuami pakhat nih The Chinland Post ah a chim.

Chan Maung Pa nih cun, “Atu hi kan khuabawi pa zong Tio lei ahcun a va kal lio a si. Zanlei deuh ah biafang deuh  kan thanh than khawh te hna lai ti ka zumh. Atu i ti ah a paammi hi a fenhnak zawn ah taan dawh a si lo. Tu lio cu ti hrat a chiat tuk caah le ti zong a lianh pah caah lan laak in a fenh thluahmah ko lai ti ka zumh” tiah a biapeh ah a chimchap.

Atu hi zeitindah thil sining a si, a ruak an hmu cang maw? Aho nih dah ti i a paam cu a hngalh? Zeitindah thil sining a si timi fiangte in kan hngal kho rih. Tio tipi kam ahcun a caw hruaimi (a cawkaanhmi) lawng cu khuami le CNF/CNA nih an hmuh, amah cu an hmu lo tiah kan theih.

About The Author

Na ruahning rak langhter ve.. (Leave a comment)

%d bloggers like this: