Breaking News; Vaar Ah Minung Pathum Ti An Tla I Pahnih An Ruak In An Char Hna
TCP-Hakha| 2019 May 1| May 1 chun Vaar ah ti aa liomi ngakchia pathum ti an tla i minung pahnih cu an ruak in an char hna, minung pakhat cu an kawl cuahmah liopi a si tiah kan theih.
Hi kong he pehtlai in a hmun ah a kal vemi Saya Tuak Sang nih, “Ti a tlami hi minung pathum an si. Minung pahnih cu an ruak in an char khawh cang hna nain pakhat cu an kawl cuahmah liopi a si. Tiva a kalmi le ti aa liomi hi Falam mino minung 30 hrawng an si” tiah The Chinland Post ah a chim.
“Ti a tla i a ruak in an charmi pahnih cu; Joel Ngun Tha Thuan le Sayamah Sui Nei Kim fapa Salai Nei Lian Sang an si. A dang pakhat ti a tlami an hmuh rih lomi hi Salai Lal Tha Kim a si” tiah a biapeh ah a chimchih.
Ti an tlak liomi an hmuh hna cangka in Vaar ah a ummi tilio thiam hna nih an va zuanhnawh colh hna. Asinain, an nunnak an chanh manh ti hna lo. Tilio thiammi an va phak ahcun an rak thi cang, an ruak tu in an chuahpi hna. Ti an i lionak hmun hi Vaar hlei thlang te ah a si tiah kan theih.
Atu hi a thimi pahnih zong cu inn ah an tinpi kho rih hna lo. Palek nih Falam sii-inn ah an kalpi hmasa hna lai i zeitindah an thihning taktak a si timi an chek ta hmasa rih hna lai tiah kan theih.
Photo Credit: Salai Lungpi Memu facebook
About The Author
