Bual Voi 11 Tluk A Co Cangmi Uk Ling Thang Le The Chinland Post Biaruahnak

0

Tawk Tling Thang| 2019 February 18| Atu lio US ram Lai pathawng Uk Ling Thang hi Laimi lakah bualco tambik khan a si. Voi 11 tluk bual a co cang. Rung Lian Ceu hi voi 11 hrawng bual a co ve cang. Tutan ah Uk Ling Thang cu paih kong he pehtlai in The Chinland Post nih a tanglei bantuk in biaruahnak kan ngeih.

TCP-1: Nangmah le na chungkhar kong tawi hngalh kan duh ko?
ULT: Ka chuahkehnak cu Hakha peng, Hniarlawn khua a si. Ka nu le pa min cu; Pu Hniang Uk (tleicia) le Pi Sai Thlia an si. Unau pa sarih lakah a hniangbik ka si. Atu ka umnak Dallas TX ah ka um. Shushi rian ni 7 chung ka tuan thluahmah ko 😛

TCP-2: Zeitindah ramdang na phak ning a si?
ULT: 2013 ah US ka phan, ka u le pathum he kan um.

TCP-3: Paih na rak i awtnak le bual na co hmasa biknak?
ULT: Paih kaa awtnak hi kum 5 hrawng ka rak si lio in a si cang. Bual ka co hmasa biknak cu 2016 kum Dallas CND ah zatlang he zuamcawh he bual k arak co.

TCP-4: Ramleng na phak hnu ah bual hi voi zeizat dah na co cang?
ULT: Ramleng ka phak hnu ah bual hi voi 11 hrawng cu ka co cang, Pathian thawng in. A dikthliar cu kaa chingchiah ti lo.

TCP-5: Tutan zatlang le zuamcawh paih ah a pahnih te in bual na comi cung ah na feeling?
ULT: A si, tutan zatlang he zuamcawh he bual ka co cu kaa lunghmuih tuk hringhran. Pathian ka thangthat. Laimi chung ah mah tluk a sunglawi bualco an um rua lo, ka theihmi chung ah!

TCP-6: Laimi nih zeitluk in dah paih hi tha kan pek awk a si tiah na ruah?
ULT: Laimi a simi paoh nih kan Lai paih hi kan dirkamh a hau ti ka ruah. Zeicahtiah cun, Kan Laimi nih kan i ngeihmi lentecelh cu Lai paih lawng hi asi i mizapi siseh, aa paimi siseh, tha kan pek i kan tanh i kan dirpi cio a hau.

TCP-7: Hmailei ah tah naa pai rih ko lai maw? Atu ah nangmah an zuamcawhtu um hna sehlaw na tlai hna lai maw?
ULT: A si, kaa pai thluahmah ko lai. Pathian nih damnak a ka pek ahcun, bualco nakin kan Lai paih a thancho hi ka duh deuhmi a si. A ka zuamcawhtu an um i mizapi nuamhnak ding a si ahcun ka tlaih ko hna lai.

TCP-8: Hmailei ah kan i paihning kong ah zeital thlenremh na duhmi a um maw?
ULT: Kan i paihning hi a tha tuk ko ti ka ruah. Nikhat hnu nikhat in a thangcho chin lengmang ko. Aa paimi nih ziarngeih lo le paih tlangtla nih tanhmi ngeih lo ahcun a thangcho chin thluahmah ko lai.

TCP-9: MMA tibantuk ah i thuat ve ding saduhthah na ngei maw?
ULT: Atu tiang cu ka ngei rih lo.

TCP-10: Paih le gym tuah hi a biapi maw?
ULT: Laitlang lei ummi an si, ramleng ummi kan si ah paih a uarmi le aa paimi caah gym tuah hi a biapi tuk. Gym tuah hi i paihnak ca lawng si lo in taksa ngandamnak le takpum dawhnak zong asi.

TCP-11: Paih kong ah siseh, ramkip Laimi sin ah biacah le chimphuan na duhmi?
ULT: Ramkip i a ummi kan Laimi phun hawi hna nan zate in keimah Uk Ling Thang nih nan kut kan tlaih hna. Atu bantuk in hmailei zong ah kan dirkamh chin lengmang ko uh. Nan thapeknak thawng in paih a thang cho chin lengmang, nikhat hnu nikhat in! Cun, kan Laipa a simi nihcun rak kan paih pi cio uh, nang kan tei e, kei nih kan tei ee tinak lungput ngei lo in kan Lai paih hi dirpi in thanchoter chin cio hna usih. Nan dihlak cung ah kaa lawm.

Hika ah 2019 NAPC nih a tuahmi zuamcawh paih ah Uk Ling Thang nih world champion a conak video tawite zoh khawh a si. 

Atu lio ah North America Paih Committee world champion cu Uk Ling Thang a si. Amah a tei khotu an um rih lo. A luancia kum ah Rung Lian Ceu he an rak i pai i Rung Lian Ceu nih a rak tei. Cu hnu cun anmah pahnih an i pai ti lo. Atu lio dirhmun in cun Lai pathawng bik ah an zumh bikmi hna cu Uk Ling Thang le Rung Lian Ceu hi an si tiah kan theih.

Photo: NAPC facebook

About The Author

Na ruahning rak langhter ve.. (Leave a comment)

%d bloggers like this: