Thantlang Peng, Bualpeng chungah Salen khua Dah Lo 2020 Lopil Kum Vui A Chia

Salai David Van| TCP-Hakha | 2020 December 4 | Thantlang Peng, Bualpeng chungah Salen khua dah lo 2020 kum lopil kumvui a tha lo tiah Bualpeng khuakip Khuabawi hna sin in kan theih.

Hi kong he pehtlai in Bualpeng Khuabawi mi tam deuh nih “Tukum 2020 lopil kum vui a chiatnak hi khua caan tha lo nih a den ruang ah le a hri nih a tlak tuk ruangah asi” tiah an chim asinain Sialam khuabawi nih cun “tukum cu cozah le NGOs lei nih dum tuah tha an van pek tuk caah dum tuah aa thokmi tete kan van tam deuh i lo thawbi tete lawng kan tuah caah kum chuak ei kan ngeih lonak asi” TCP biahalnak ah an chim.

Sihmanhsehlaw Salen khuabawi tu nih cun “kannih Salen khua hi inn 170 hrawng kan si i 120 hrawng hi lo tla kho kan si. Hi chung ah hin cheuthum cheuhnih hi cu a khim ah kan tla. Kannih Salen khua hi Pathian dawtnak thawngin 2020 kan lopil kumvui hi a tha ko. Tukum ah pung600 hrawng a ngei mi hi tam cem ngei an si te lai. Pung 300, 400 hrawng a ngei mi zong an tam pah te lai cun zapi vantla hi pung 150, 200 hrawng hi kan si hna i pung40, 50 a ngei zong an um ve thiamthiam ko tiah a chim.

Hi kong he pehtlai in Bualpeng khua tam deuh ahcun kumcheu ei hrawngte lawng kan ngei hna i fur ei awk cu Kawl facang(raasen) ei kan hauh te lai caah thinphang kan si ko. Abik in India ramri khua sa,khua kiken deuh kan si hna caah hin facang cawk nak cu chim lo lamsul lei le cawkcia raasen phorhtlunhnak kong hmanh ah lungre thei cia kan si ko tiah Bualpeng Khuabawi tam deuh sin in kan theih.

Peng Cozah Ohsuh le cawlcanghningin Thantlang Peng Bualpeng chung a ummi khua hna cu Salen, Vomkua, Belhar, Tluangram, Lulpilung, Tikir, Bahnahtlang, Hmunhalh, Sialam hna an si tiah kan theih.