Budget Suaisamnak Kongah Mizapi Thazaang I Teltum A Herh: Pu Zo Bawi

Salai Elvis| 2019 March 14|Ramkulh cozah Budget kongah langhngannak (transparency) a um khawh nakhnga mizapi thazaang lei zong i teltum a herh bantuk in budget thazaang a thawn nakhnga ramkulh Hluttaw le Hluttaw palai hna zong i bawm in kan tawlrel lai tiah Pu Zo Bawi nih March 12,  2018-2019 kum Citizen’s Budget kong fianternak ah a chim.

Atu bantuk in mizapi sinah 2018-2019 kum Chin Citizen’s Budget kong fianternak nan tuahmi cungah kan i lawm i hi Budget lawng si lo in a dangdang budget kongkau zong ah langhngannak (transparency) a um khawhnak ding ah mizapi duhnak le ruahnak ngaihpiak in an herhbau mi kongah Chin ramkulh cozah nih fakpi le pehzulh in tawlrel khawh kan i zuam lai” tiah Chin ramkulh Hluttaw Speaker Pu Zo Bawi nih a chim.

Chin ramkulh nih hmuhmi le hman mi budget  cu thlam langhngannak a um khawh nakhnga tawlrel a herhnak kong, Cubantuk in Budget kongkau hlathlai a duhmi hna nih zeibantuk hmun ah dah budget thazaang a dernak a si timi fawizaang tein an theih khawh lai pin ah ruahnak tampi an chuah lai nak kong, a tutan Budget kongkau fianternak tuahmi nih hin hmailei riantuannak caah lam hruaitu pakhat a sinak kong le mizapi ai-awhtu kan si bantuk in mizapi duhherh ning tein budget tawlrel ding Hluttaw nih an ngeihnak kong a chim chih.

Tutan 2018-2019 kum Chin ramkulh Citizen’s Budget kong fianternak Renaissance Institute le ramkulh budget kongkau tawlreltu hna i bawm in a voikhatnak bik mizapi sin ah fianternak an tuah hi a si. Hi pin lei zong ah pehzulh in tuahtuan kan i bawm rih lai tiah Renaissance Institute tuanvo ngeitu Director U Soe Win nih a chim.