Bungkhua Tlanglo Facang Zu Nih A Cikpiak Hna Caah Khuami Lungrethei In An Um
Salai Elvis| 2018 July 24| Thantlang peng Bungkhua tlanglo facang an cinmi facang phur in zu nih a cikpiak hna caah khuami lungrethei in an um tiah theih a si.
July 10 hnu in biatak tein zu nih an khuapi te ti awk in an fang a cikpiak hna caah zu sii le zu rap zong an chiah ko hna nain an that kho tuk hna lo tiah theih a si.
“Khuapi te ti awk in zu nih lo fa cang cinmi a hram in a cik hna. Khur khat ah kung li nga cio cu a cik dih hna. Hi kongah zu sii le cep a tunhmi zong an um len hna nain zu cu a fat tuk caah cu tluk in an that kho hna lo i kan buai ngai cio ko. Hi thil a can cu July 10 khan a si. Kan lo chungah thakbare zong cin an si ko nain facang deuh hi a hrawhmi a si i kawm kan cinmi hnih khat zong a par um lo in a hrawh dih. Upa cheukhat an chim ningah cun kumdang zongah a hrawh pah ko hna i an bir than. Asinain tukum a hrawh ning cu a hram bak in a si caah kan tha chia ngai i kan i tinh ning bantuk in cun a vui ti lai lo” tiah zu nih an lo a hrawh vemi Bungkhua khuami DR Lian nih TCP ah a chim.
Atu bantuk in Bungkhua lopil cu kum dang zongah zu nih a hrawhpiak tawn hna nain a tu bantuk fak in a hrawhpiak bal rih hna lo. Hi kongah khuabawi tlang zong nih uknak lei tuanvo ngeitu hna sin ah chim phuannak a um rih lo tiah theih a si.
Atu bantuk in 2017 kum lio zongah Fanthen le Hnaring khua lei zong zu nih an lo kawm hmun a rak hrawhpiak bal hna i cozah nih zu sii in an rak bawmh bal hna tiah theih a si. +++
About The Author
