Bungtlang Ngakchia (7) JCB Aa Citmi Accident An Tong; Pahnih An Thi

Salai Josephbawi| TCP-Hakha| 2020 September 8| Thantlang peng Saisichuak lam donghnak Tipi pawng ummi Bungtlang khua ngakchia kum (5) in Kum (12) kar minung 7 hna cu Bungtlang in Hri-Awh tiva lei lamcawhnak JCB Sehkyi an icitnak in September 6, 2020 ah Accident an tong i minung (2) an thi, a dang minung (5) cu fak ngai in hliamhma an tuar caah Hakha Thantlang siizung ah an itlop cuahmah lio a si tiah thawng kan theih.

A thimi minung 2; nu pakhat (kum 6) fai le pa pakhat (kum 11) cu September 7, 2020 zing 10:00am tluk ah ruak an vui hna tiah theih a si.

“Bungtlang ngakchia kum 5-12 kar tangcheu in tang (4) kai karlak tluk ngaichia hna nih Cozah Sakremhnak (Sohlohyii) JCB amawngtu Lalompuia (Kalay peng ummi) cu JCB in vahpih an hauh rua i Bungtlang in Hri-awh tiva lei kap JCB hakuang chung a cuanter hna i a kalpinak hna nak ah hi thil an can hi a si. Cheukhat nih JCB ttawl ah a kal a timi zong an um. JCB Mawngtu pa nihcun Brake a rawk a ti nain JCB aha chung an thut tikah capo in ahlorh, a cawithlirnak hna zongah an tla I ahnormi hna a si kho tiah ruah a si. Cheukhat nihcun a kalpah in a thleksual hna i laupah in ahnu thawn bu in a hnor dihmi hna zong a si kho. Thantlang ka phan I fiang tein ka thei kho ve rihlo” tiah Bungtlang Bawi Rem Nu nih The Chinland Post ah a chim.

JCB aa citmi hi nu 3, pa 4 an zapi (7) an si i nu pakhat le pa pakhat an thi. Pa pahnih cu an elruah a kiah ca le an zual deuh ngai caah Hakha siizungah an thlop cuahmah lio an si i nu (2) le pa (1) cu Thantlang siizungah an um lio a si tiah theih a si.