Bungzung Bi-let-me Sehzung Riantuantu A Voihnihnak Tender An Auh Than Lai
Salai Elvis| 2019 March 26| Hakha peng Bungzung khua pawng Leium khua i Bi-let-me chuahnak ding caah riantuantu ding cu relrem lonak a um than caah avoi hnihnak riantuantu ding Tender an auh than lai tiah kan theih.
Mah Bi-let-me chuahnak ding caah 2018 November 27 ah Tender hunnak an rak tuah nain riantuantu ding a si mi Company cu relrem lonak a um than caah a thar in avoi hnihnak riantuantu ding Tender auh an timh than nain zetik an auh lai a fiang rih lo.
“Bi-let-me chuahnak ding kongkau Survey cu an tuah dih cang, riantuan dingin Tender a hmumi Company kha kan theihnak ah tlawmpal te an tlamtling deuh than rua lo, cutin an vun i nawnnok dih caah an mah an chim nak le kan theihnak ah cun kum khat le cheu chungah Bi-let-me an chuah khawh cang lai ti tiang lawng kan theih. Fiang fai tein kan hngal kho ve lo. A ruang cu rampi cozah nih an tlaih mi rian a si caah a si. Zei tikah dah a voihnihnak Tender an auh than te lai ti cu kan hngal rih lo” tiah lam le sul vuanci Pu Sui Thio nih TCP ah a chim.
“Bi-let-me chuahnak ding caah mei tha a herh mi zong tiva kham hau lo in Ma-ha-dat aa- line thenhpeknak (khuai-zung) tu a pawng ah an sak lio pi zong a si. Mah mei tha nih duh tawk in Bi-let-me a chuah khawh ko lai e an kan ti” tiah Vuanci Pu Sui Thio nih a chim.
Mah Bi-let-me chuahnak ding caah sehzung pahnih hun an timh i sehzung pakhat nih mei tha 45W tluk hrawng a hman lai tiah ruahdamh a si. Hi mei lak nak ding caah Bungzung kam tiva pahnih aa tonnak hmun cu dil in meilak ding timhtuah a rak si bal nain Ma-ha-dat-aa line tu hman than an timh hi a si.
Leium khua Bi-let-me chuahnak ding caah sehzung pahnih hun an timh mi chungah ni khat ah sehzung pakhat nih Bi-let-me tun 100,000 a chuah khawh lai i pahnih nih ni khat chungah tun 200,000 chuah peng khawh a si lai tiah kan theih.
About The Author
