Bungzung Khuapawng Tiva Ah Mei Tha 60 MgW Chuak Kho Ding Cithlat An Tuah

Salai Elvis |2018 September 13| Hakha peng Bungzung khua pawng tiva pahnih aa tonnak hmun ah mei tha 50 in 60 mgw tluk a chuak kho ding tuanvo ngeitu hna nih hlathlainak (survey) an tuah tiah theih a si.

“Bungzung khua pawng ah mei tha 50 in 60 mgw a chuak kho dingmi riantuan kan tim, KL Amazing Company nih hlathlainak zong an tuah cang. A that i a tlam tlin ding dirhmun a si ko ahcun cunglei tuanvo ngeitu hna sinah kan chim te lai. A bik in bi-let-me (cement) seh zung caah hin mei tha tampi a herh te ding a si. Hi sehzung caah Maha-dat-line lawng rinh in hman chih a si ahcun a dang khua pawl harnak an tong kho. Cucaah bi-let-me sehzung caah hin mei tha 45 mgw tluk a herh ding a si caah a tu lio mei lakding timhtuah mi le Maha-dat-line tha vun fonh ahcun a tlamtling ding a si. Mei laknak kongah khua mi hmuh ning le ruahnak halnak zong kan tuah te hna lai” tiah sipin vuanci U Soe Htet nih TCP ah a chim.

Bungzung khua Bi-let-me sehzung cu hmunhnih ah tuah a si lai i ruahti a ko in riantuan ning an suaisam cang lai. Hi bi-let-me rian a tlam tlin ahcun ramchung ramleng he kuat a si lai tiah theih a si.

“Mei laknak ding an zoh ti cu kan theih i khuami caah harnak a kan pek pah ko lai, a ruang cu Bungzung khua lawng si lo in tuah an timhnak zawn khi Keiluan khuami hna lei kung a si cang. Si nain cozah nih an i timh mi cu liamh nak (zaw-ce) zong an tuah te ko hna lai, khuaram thanchonak caah thil tha a si ko mi cu, cozah leizong nih khuami aw-ann theih duh ah an ra te ko lai tiah kan chimh ko hna nain a lungfak mi hna an um” tiah Bungzung khuabawi pa nih TCP ah a chim.
Electric mei an laknak ding hmun cu Riva tiva le Yahaw tiva an i tonnak Chaung-sone timi ah a si lai tiah kan theih.+++

Na ruahning rak langhter ve.. (Leave a comment)

%d bloggers like this: