Bungzung Mirang Vawlei Chuahnak Ding Ah Kum Hnih Leng A Rau Rih Lai

Salai Elvis|22 August 2019| Hakha peng Bungzung khua pawng Lei-um khua Mirang vawlei (Cement) sehzung rianthoknak ding caah hi hnu kum hnih leng tluk caan lak a si rih lai tiah Chin ramkulh lam le sul vuanci Pu Sui Thio nih a chim.

“Hi riantuannak caah avoi khatnak rian (Tender)a soktu Company a si kho lo, avoi hnihnak U Kyaw Win te zong an si kho lo i avoi thumnak pa nih hin a hmuh i hi hnu kumthum caanlak hnu ah chuah khawh ding a si nain Vice President nih a duh lo, a tambik kum hnih le a cheu tel ah na tuah lai a ti i a ran khawh chung rang in tuah ding a cu a si ko. Hi rian cu Company pakhat lawng a si ko lai, mi zei Company a si tu cu ka chim kho rih lo nain Company lian ngaimi cu a si” tiah vuanci Pu Sui Thio nih TCP ah a chim.

Hi Mirang vawlei sehzung caah a dang tein mei tha zong lak ding timhtuah a rak si nain Bungzung ah Maha-dat-aa line zungthen (khuai-zung) an sak mi tu in sehzung cu mei tha pek chin dingin cozah nih timhtuahnak an ngei than.

“Mirang vawlei (Cement) chuahnak ding caah mah-ha-dat aa line zungthen (khuai-zung) zong an sak lio pi a si, cu nih cun mei tha a pek chin lai. Asinain a zat thlu lai lo ti a si i cu tucu zeitin dik a si te lai ka thei thlu ve rih lo” tiah vuanci Sui Thio nih a chim.

Bungzung khua pawng mirang vawlei chuah khawhnak ding caah sehzung pahnih chiah ding in timhtuahnak rak ngeih a si nain a tu ni tiang a voithumnak rian auhnak an tuah mi chung ah Company pakhat lawng nih rian a hmuh rih. Hi mirang vawlei a chuah khawhnak ding caah sehzung pakhat nih nikhat ah tun 100,000 a chuah khawh lai i ramchung/leng tiang zuarzamh ding zong ramkulh cozah nih timhtuahnak an ngei tiah kan theih.

Leave a Commnet

%d bloggers like this: