C. Ronaldo Nih Penalty A Goal Kho Lo; Group A Le B In Sunghtlak A Chuih Ding Le Neknawi Result
City Hunter| 2018 June 26| June 26 deilei ah Group B in Portugal le Iran an chuih i C. Ronaldo nih penalty a sut nain a goal lo, 1-1 in an i tluk caah Portugal cu mark 5 in sunghtlak (round of 16) chuih ding ah an kai cang. Cu bantuk in Group B in Spain le Morocco an chuih ve i 2-2 in an i tluk caah Spain cu mark 5 in sunghtlak (round of 16) chuih ding ah an kai ve cang. Group A le B in sunghtlak (round of 16) a chuih dingmi phu le group stage an chuihmi neknawi result cu a tanglei bantuk in an si.
Uruguay Le Russia
June 26 zan ah Group A in Saudi Arabia nih 2-1 in Egypt an tei hna. Cun, Uruguay nih 3-0 in Russia an tei hna caah Uruguay cu mark 9 in Group A pakhatnak le Russia cu mark 6 in pahnihnak sunghtlak (round of 16) chuih ding ah an kai cang.
Group A le B In Sungh/tlak A Chuih Ding
Tukum world cup ah sunghtlak (round of 16) chuih kho ding ah group stage in a awngmi hna cu; Group A in Uruguay le Russia an si, group B in Spain le Portugal an si.
July 1 deilei (zarhte ni zan) suimilam 12:30 ah Uruguay le Portugal sunghtlak (round of 16) an chuih lai. Cu bantuk in July 1 zan (Sunday zan) suimilam 8:30 ah Spain le Russia an chuih ve lai. A awngmi paoh Group C le D in sunghtlak (round of 16) a awngmi he quarter final an chuihte lai.
Group A Result Zohthannak
Tukum World Cup Group A ah aa telmi phuli cu; Russia, Uruguay, Saudi Arabia le Egypt an si. Uruguay hi puai khat hmanh sungh lo te he mark 9 in group stage ah pakhatnak in an awng. Group stage in goal an ngeihmi zapi goal 5 a si, Luis Suarez nih goal 2 a sut piak hna. Russia hi puai hnih an awng i puaikhat an sung. Goal an ngeihmi zapi hi goal 8 a si. Denis Cheryshev nih goal 3 a sut, Group A in goal tambik suttu zong a si chih.
Saudi Arabia hi puai thum chung ah puai khat an awng i goal 2 lawng an ngei. Mark 3 in group stage ah an tla. Egypt hi puaithum chung ah puaikhat hmanh an awn lo caah mark khat hmanh an hmu lo. Goal 2 an ngei i Mohamed Salah nih a goal 2 ningte in a sut. Group stage ah arti a khek lomi le fak bik in a tlami cu Egypt an si.
Yellow Card le Red Card
Group A in group stage chuih a dih tiang ah yellow card 12 le red card pakhat a um. Red card pekmi cu Russia in Igor Smolnikov a si. Group A in group stage chuih a dih tiang ah yellow card pek a um lomi puai cu June 20 zan ah chuihmi Uruguay le Saudi Arabia puai a si, a thianghlim bikmi puai zong a si. Group A in group stage chuih a dih tiang ah penalty a sut i a goal kho lomi cu Saudi Arabia in Fahad Al-Muwallad a si.
Group B Zohthanhnak
Tukum world cup ah Group B in phuli cu; Spain, Portugal, Iran le Morocco an si. Spain hi mark 5 in group stage chuih ah pakhatnak in an awng. Puai thum chung ah puai nih an i tluk i puaikhat an awng. Goal an ngeihmi zapi goal 6 a si, Diego Costa nih goal 3 a sut. Portugal hi puai hnih an i tluk i puaikhat lawng an awng ve. Goal an ngeihmi zapi goal 5 a si, C. Ronaldo nih goal 4 a sut. Tukum World Cup ah penalty a chuih hmasa bik le a goal hmasa bikmi hi C. Ronaldo a si. Cu bantuk in penalty a sut i a goal kho lomi zaanglekcelhtu lak zong ah aa tel ve thiamthiam.
Iran hi puaikhat an awng, puaikhat an i tluk i puai khat an sung. Mark 4 in group stage chuih ah an tla. Goal an ngeihmi zapi hi goal 2 a si. Morocco hi puai hnih an sungh i puaikhat an i tluk. Group Stage chuih ah mark 1 in an tla i goal an ngeihmi zapi hi goal 2 a si ve. Arti an kheh khawh ceo te khi a si.
Yellow Card Le Goal Tambik Suttu
Group B hi group stage chuih a dih tiang ah yellow card pekmi minung 20 an si, red card pekmi cu an um lo. Yellow card pek a tlawm bikmi le a thianghlim bikmi phu cu Spain an si, minung pakhat te lawng pek a tong. Group B in group stage chuih a dih tiang ah goal tambik a suttu cu Portugal in C. Ronaldo a si, goal 4 a sut cang. A changtu cu Spain in D. Costa a si, goal 3 a sut ve cang.
Ahodah Quarter Final Kai Lai?
Group A le B in ahodah quarter final a kai lai timi hi chimchung cia awk a har ngai. Chim zong ah a palh kho i a dik kho ve fawn. Catialtu pumpak nihcun sungtlak chuih (round of 16) ah Uruguay le Portugal an chuih lai i Portugal hi quarter final an kai kho. Cun, Spain le Russia an chuih lai i Spain hi quarter final an kai lai ti ka zumh. Nangtah ahodah na zumh ve hna?
About The Author
