Ca Rel Hna Usih
James Ceu Lian Thang| 27 January 2016
“Zeihmanh rel hlah, ca lawng rel!”
Minung nih hin kan tuah awk hrimhrim a simi hna lak ah carel hi aa tel. Kanmah lawng a nungmi kan si lo caah carel hi kan herh. Mifim mihrut, mizaw midam le mi zei paoh nih carel hi kan thiam dih awk a si i kan rel dih awk a si. A bik in Baibal cauk, thawngthanh ca, mifimthiam hna ca chuahmi le maivan (Internet) kip ah ṭialmi hna hi kan rel khun ding an si. Hi bantuk cauk le capar vialte hna hi sullam ngei tein le santlai ding tein, a rel caan nak in caan sau deuh la in timhtuahmi an si hna.
Ca hi rel lo ding ngaingai ah cun an chuahmi a um lo. Cucaah zei bantuk ca poh hi rel ah a ṭha ko. Ca nih cun hramhraam in na lung an la lai lo, lungthlehnak le biahalnak an tuah ta lengmang lai i a dikmi le a fekmi biachahnak na tuah khawh nakhnga lam kaupi an hunpiak lai. Minung nih kan herhmi thil vialte cu ca chung ah ṭial dih ngawt an si ko caah, midang chim chommi nak in ca chung i aa ṭialmi kha rel law zul deuh, tuah deuh. Thlarau lei ah rawl thaw bik ei cu Baibal carel hi a si. Cauk rel ding a ngeimi si nakin a relmi si hi a biapi deuh. Carel hi na zia ah i lak kho law rel huamlonak rai nih fawi ngai cun an tlak kho ti lai lo.
Ca loin minung hi kan nung kho lo an ti tawn. Carel loin mi chimmi paoh aa rinh pengmi na si ahcun, zeitik hmanh ah hawi na tluk kho hna lai lo i hawi tang ah na um peng lai. Cun ca na rel lo ahcun na biaknak a thawtnam (thlarau lei biathli), na nunphung le na sinak hna nikhat hnu nikhat in na thlau thluahmah hna lai. Ca na rel lo ahcun nun na thiam fawn lai lo. Carel a huam bak lomi cu nun a huam bak lomi he tahchunh awk an ṭha bik, zeicatiah mifim hna nihcun, nung ding ah ca kan rel tiah an ti. Cauk na thlaumi nakin a um peng ko bu i na rel lomi hi a poi deuh. A ruang cu na cauk kha hei thlau law a rak hmutu tal nih an rak rel khawhmi a si. Cun rel ding cauk ngeihlo nakin ngeih ko bu i rel lo hi sual a si deuh fawn.
Baibal cauk, cazual, magazine hna le cauk phunphun hna hi rel lo ahcun thil sawhsawh an si. Asinain rel ahcun khiah awk a ṭha lomi thil mansung ro thil le santlai thil ah an cang. Miphun pakhat sinak le nunphung ah a hrampi bik a simi cu cauk tlawm-tam ah aa hngat lo, careltu an tlawmtam ah aa hngat.
Ref.;
“A Dance with Dragons” by George R.R. Martin.
“Shadowlands” by William Nicholson,
“I Can Read With My Eyes Shut” by Dr. Seuss,
C.S. Lewis
Stephen King
Ray Bradbury
James Ceu Lian Thang nih, Chin Digest Vol. 2, No. 1 (February 2017) chuakmi ah a rak tialmi a si. Catialtu James hi The Chinland Post riantuantu chungtel pakhat a si i, a tulio ah USA ram, Atlanta, Georgia khua ah sianginn kai a peh cuahmah lio a si. ~ Editor
About The Author
