Caan Karlaknak Thimnak Caah Chin Party An I Fonh Kho Rih Lo; NLD Le CLD Palai An I Fiang Cang

0

Kehlei in: Pu Zo Zam, Pu Ngai Sak le Pu No Than Kap

City Hunter| 2018 July 5| Aralaimi November 3 ah tuahdingmi caankarlak thimnak ah Chin party an i fon kho rih lai lo. Thimfung hmunhma i kianh in anmah le party bing cio te in thimnak an lut lai. CLD le NLD party in thimnak aa cuhtu ding palai an i fiang cang tiah kan theih.

Hi kong he pehtlai in CLD (Chin League for Democracy) party chairman Pu Ngai Sak nih, “Thimnak commission nih May thla tiang party register a tuahmi lawng thimnak luh khawh a si lai an ti caah Chin party pakhat ah i fonh in a ralaimi thimnak ah kan lut kho lai lo. Kanmah le party cio min in thimnak kan lut lai. Asinain thimfung hmunhma tu kan i kian lai. Matupi ah CLD kan i cuh lai i Kanpetlet ah CNDP an i cuh lai. Tamu ah CPP aa cuhtu ding an um ahcun an i cuh lai. Matupi ah CLD party in aa cuhtu ding cu mino te a simi U Aung Lian a si lai, party nih kan fehter cang. Chin party nih teinak kan hmuhnak ding ah kan i bawm thiamthiam ko lai. Matupi ah CLD kan i cuh lai nain CNDP nih a kan bawm thiam lai i Kanpetlet ah aa cuhmi CNDP zong CLD nih kan bawmh ve thiamthiam ko hna lai” tiah The Chinland Post ah a chim.

“Tamu hi a tlangpi in CPP (Chin Progressive Party) cuhding kan ti ko nain MP a rak thimi kha Thado a si. Thado phun pawl nih aralaimi caankarlak thimnak ah anmah Thado mi nih U Chit Maung kha naa cuh lai tiah an forhfial. Atu hi cawlcanghnak zong an ngei pah cang. U Chit Maung nih CLD party in kaa cuh lo ahcun pumpak (Independence) in kaa cuh lai a kan ti. Cucu, atu hi CPP he felfaite in kan i ceih kho rih lo. Amah U Chit Maung nih commission ah cazin a pek cang le pek rih lo zong kan hngal lo” tiah a biapeh ah a chimchih.

“Caankarlak thimnak caah thimnak hmunhma a lawngmi hi hmun 13 a si, a zapite thimnak kan i cuh dih lai. Aa cuhtu ding palai cu; Kanpetlet peng ramkulh hluttaw in U Aung Thang, Matupi peng Pyithu hluttaw in U Hnyunt Win, Tamu peng ramthen hluttaw in U Aung Shwe an si” tiah NLD chimnak nawlngeitu Dr. Myo Nyunt nih a chim.

Zomi Congress for Democracy (ZCD) party haotu MP Pu Cin Sian Thang nih, “Tamu peng ah thimnak luh kan duh ko nain aa cuhding palai kan ngei rih hna lo. Kaa cuh lai a kan tu zong khual a tlawng i atu tiang a rak tlun rih lo caah kan i cuh kho men lai lo. Party nih cuh le cuh lo ding biakhiahnak kan tuah kho rih lo” tiah The Chinland Post ah a chim.

CNDP (Chin National Democratic Party) party kong ah party CEC chungtel Pu Siang Mang nih, “Matupi ah CLD, Kanpetlet ah CNDP, Tamu ah CPP i cuhding in ceihmainak kan ngei. Asinain CLD nih Tamu ah cuh an duh than i felfaite in kan i ceihmai kho rih lo. CNDP tu cu kanmah CEC nih ceihpiak kan tim hna lo, anmah Kanpetlet peng party nih an thimmi palai kha thimnak aa cuhte ko lai, aa cuhtu ding party nih fehternak kan tuah rih lo” tiah The Chinland Post ah a chim.

Thimnak aa cuhtu ding palai min cazin pek caan hi July 2 in 11 tiang lawng onh a si. Hi chung ah aa cuhtu ding palai cazin aa fiang dih te lai. Min cazin pekmi zuhlaak (hrawh) than duh ahcun July 13 ah a hnu bik laak le hrawh than ding a si lai. Thimnak aa cuhtu ding palai min cazin pekmi cu July 16-22 tiang commission nih chekhlat an tuah lai.

Chin ramkulh ah MP thutdan 39 a um. Hi chung in 2015 kum thimnak tuah lio ah party kip in MP thutdan an hmuhzat cu; NLD nih MP thutan 28, ZCD nih MP thutdan 6 le USDP nih MP thutdan 5 an hmuh.

About The Author

Na ruahning rak langhter ve.. (Leave a comment)

%d bloggers like this: