Caankarlak Thimnak Ah Zomi Congress for Democracy Party Thimnak An Lut Lai
City Hunter| 2018 May 21| November thla ah tuahdingmi caankarlak thimnak ah Zomi Congress for Democracy (ZCD) party cu Sagaing ramthen MP thutdan a lawnnak hmun pakhat ah thimnak cuh kan i tim tiah party in General Secretary Pu Kim Kam Lian nih a chim.
ZCD cu 2015 thimnak tuah lio ah Chin ramkulh mee hmunhma cheukhat ah teinak a hmumi party an si.
A ralaimi caankarlak thimnak ah Chin miphun tamdeuh umnak Chin ramkulh Kanpetlet ah Pyithu hluttaw mee hmunhma le Matupi ah ramkulh hluttaw mee hmunhma a lawng. Cu pin ah Chin miphun tam nawn khua an saknak Sagaing ramthen, Tamu ah ramkulh hluttaw mee hmunhma pakhat a lawng tiah theih asi.
“Atu MP thutdan a lawngmi Matupi le Kanpetlet hi Chin miphun tampi an umnak a si ko nain kanmah he pehtlaihnak kan ngeih lem lo caah MP thutdan cuh kan I tim lo. Asinain Tamu tu ahcun kanmah he phun aa khatmi tampi an um caah thimnak luh ding in timhtuahnak kan ngei. Ahodah aa cuh lai timi zong minung kan kawl cang” tiah Chin ramkulh in No.5 Amyotha hluttaw palai zong a si chihmi MP Pu Kim Kam Lian nih a chim.
ZCD party cu 1990 ah hluttaw palai minung pali thimnak an lut i minung pahnih MP an tling. 2012 ah ramkhel party in registration an tuah than i 2015 kum thimnak ah Chin ramkulh in MP minung 6 an tling. Hi MP 6 chung in Pau Lun Min Thang cu Chin ramkulh Social Affair Minister ah rian pek a si. Hi ZCD party cu NLD he hawikomhnak aa tuahmi party an si caah hi party pahnih karah a thami pehtlaihnak fek an ngei.
Caankarlak thimnak cu November 3 ah kan tuah lai tiah ramkomh thimnak commission nih phungningte in an thanh cang. Asinain, zeitik caan ah MP aa cuhtu ding min cazin pek le zeitik ah dah mee lemsoinak tuah thawk khawh a si lai timi an thanh rih lo.
Ref: 7Day News
About The Author
