Caankarlak Thimnak Kanpetlet Le Matupi Ah NLD Party In Thimnak Aa Cuhtu Ding Palai An I Fiang Cang
City Hunter| 2018 July 2| A ralaimi November 3 ah tuahdingmi caankarlak thimnak ah NLD (National League for Democracy) party in thimnak aa cuhtu ding min cazin an thanh. Chin ramkulh Kanpetlet le Matupi peng ah NLD party in thimnak aa cuhtu ding palai cu palai an i fiang cang. Kanpetlet le Matupi peng ah Zomi Congress for Democracy (ZCD) party thimnak an i cuh lai lo, Tamu peng lawng ah an i cuh lai tiah kan theih.
“Caankarlak thimnak caah thimnak hmunhma a lawngmi hi hmun 13 a si, a zapite thimnak kan i cuh dih lai. Kanpetlet peng ramkulh hluttaw in U Aung Thang, Matupi peng Pyithu hluttaw in U Hnyunt Win, Tamu peng ramthen hluttaw in U Aung Shwe an si” tiah NLD chimnak nawlngeitu Dr. Myo Nyunt nih a chim.
“Cun, Laycha peng Pyithu hluttaw in Sai Aung Tun Lay, Tamwe peng Pyithu hluttaw in U Toe Win le Minchain peng Pyithu hluttaw in U Sein Myint, Myitkyina peng Amyotha hluttaw in Daw Yam Khaw, Mandalay ramthen Shan miphun kongkau caah Sai Pan Saing, Auhdwin peng ramthen hluttaw in U Kyaw Zayar, Tapaihcin peng ramthen hluttaw in U Soe Lwin, Yatehtaung peng ramthen hluttaw in U Khin Than Maung, Minbu peng ramthen hluttaw in U Kyaw Ngwe le Seihkaan peng ramkulh hluttaw in U Taan Htike Aung an si” tiah a chimchih. Hi cazin cu June 29 nithla khenh in an thanh hi a si.
A ralaimi caankarlak thimnak Chinram he pehtlai in The Chinland Post nih Chin ramkulh thimnak commission tuanvo ngeitu lutlai U Lin Kyaw pehtlaihnak kan tuah.
“Nihin July 2 lawng in party a cuhtu ding min cazin pek caan onh a si. July 2 in 11 tiang onh a si. Nihin tiang cu zei party hmanh nih cazin a kan pe rih lo” tiah The Chinland Post ah a chim.
Caankarlak thimnak ah aa cuhtu ding min cazin pek caan cu July 2 in 11 tiang zarhkhat renglo deuh te lawng an onh. Min cazin pekmi zuhlaak (hrawh) than duh ahcun July 13 ah a hnu bik laak le hrawh than ding a si lai. Thimnak aa cuhtu ding palai min cazin pekmi cu July 16-22 tiang an chekhlat lai tiah an thanh chih
“Atu MP thutdan a lawngmi Matupi le Kanpetlet hi Chin miphun tampi an umnak a si ko nain kanmah he pehtlaihnak kan ngeih lem lo caah MP thutdan cuh kan i tim lo. Asinain Tamu tu ahcun kanmah he phun aa khatmi tampi an um caah thimnak luh ding in timhtuahnak kan ngei. Ahodah aa cuh lai timi zong minung kan kawl cang” tiah Chin ramkulh in No.5 Amyotha hluttaw palai zong a si chihmi MP Pu Kim Kam Lian nih a chim.
Chin ramkulh in MP thutdan pahnih a lawnnak a ruang cu thihlohnak ruang ah a si. MP rian an tuan cuahmah lio ah a thimi cu; Matupi peng in ramkulh hluttaw palai MP Pu Hung Kheng le Kanpetlet peng in Pyithu hluttaw palai MP Pu San Khin an si.
“2015 thimnak tuah lio ah Kanpetlet peng in thimnak a rak i cuhtu party pali an si. Cu hna cu; NLD, CNDP, CLD le USDP an si. 2015 kum thimnak tuah lio Kanpetlet peng Pyithu hluttaw thimfung hmunhma ah mee thla khotu zapi hi 11484 an si. Cu bantuk in Matupi peng in thimnak aa cuhmi party cu; NLD, CNDP, CLD, USDP le NUP an si. Ramkulh hluttaw thimfung hmunhma No.1 ah mee thla khotu zapi hi 16445 an rak si. Tukum ah a thar in chungkhar cazin kan laak dih than cang hna. Nikum nakin mee thla khotu an tam deuh cang lai” tiah Chin ramkulh Thimnak Commission zung in lutlai U Lin Kyaw nih The Chinland Post ah a chim.
Chin ramkulh ah MP thutdan 39 a um. Hi chung in 2015 kum thimnak tuah lio ah party kip in MP thutdan an hmuhzat cu; NLD nih MP thutan 28, ZCD nih MP thutdan 6 le USDP nih MP thutdan 5 an hmuh.
ZCD party cu 1990 ah hluttaw palai minung pali thimnak an lut i minung pahnih MP an tling. 2012 ah ramkhel party in registration an tuah than i 2015 kum thimnak ah Chin ramkulh in MP minung 6 an tling. Hi MP 6 chung in Pau Lun Min Thang cu Chin ramkulh Social Affair Minister ah rian pek a si. Hi ZCD party cu NLD he hawikomhnak aa tuahmi party an si caah hi party pahnih karah a thami pehtlaihnak fek an ngei.
About The Author
