CACC Ah Education Scholarship Phunthum Sok Khawh A Si; Minung 23 An Pek Hna Lai

0

Salai Cung Cung|2018 June 15| CACC (Chin Association for Christian Communication) tawrelnak in tuahmi cathiam bawmhnak education scholarship phunthum cu 2018 kum caah June thla thawkka in August thla tiang sok khawh a si tiah kan theih.

Hi scholarship phunthum cu Secular program a kaimi lawng nih sok khawh asi, biaknak lei cu sokkhawh a si lo tiah kan theih. Sok khawhmi scholarship phunthum cu CACC in AGS – Rev. Paw Luh nih The Chinland Post ah a tanglei bantuk in a chim.

1. Van Kulh Foundation
Ramkomh Kawlram (Union of Myanmar) ramchung ah MBBS le Master in acunglei cawnnak a ngei liomi paoh nih sok khawh asi. Minung pakhat ah Ks. 200,000 cio in minung 10 pek asi lai.

2. Rev. Tial Lian le Hniang Tum Scholarship
Ramkomh Kawlram (Union of Myanmar) chungah Master in a cunglei cawnnak a ngei liomi paoh nih sok khawh asi. Minung pakhat ah Ks. 300,000 in minung 3 pek an si lai.

3. CACC-CMC, Korea Scholarship
Ramkomh Kawlram (Union of Myanmar) chungah Bachelor Program pakhat a kai liomi paoh nih sok khawh asi. Minung pakhat ah Ks. 150,000 in minung 10 pek an si lai.

Hi education scholarship cu biaknak lei si lo mi secular program a kaimi hna lawng nih sok khawh a si.Cun minung pakhat nih phun thum chungah pakhat lawng sok khawh asi. Hi soknak cu 2018 June in August tiang Hakha CACC zung ah soknak cachiah khawh a si i soknak form CACC zung ah laak khawh zong asi.

CACC in AGS – Rev. Paw Luh nih, “Vankulh foundation scholarship hi 2009 in kan thawk. 2009 in 2017 kum tiang ah 88 kan pek cang hna. Rev. Tial Lian le Hniang Tum Scholarship hi 2016 in kan thawk 2016 le 2017 kum ah a zapi minung 4 kan pek cang hna. CACC-CMC, Korea Scholarshiphi 2016 kum in kan thawk. 2016 kum le 2017 kum ah an zapi minung 21 kan pek cang hna” tiah The Chinland Post ah a chim.

Tukum caah Education Scholarship a sok cangmi hi minung 5 an si cang. Hi scholarship phunthum cu kumkhat ca lawng in pek an si. Pekciami an si ah mithar an si ah a hmaikum ah an sok than ahcun pehzulh in pek thiamthiam an si ko, an sok ti lo ahcun pek ti lo an si. CACC-CMC, Korea Scholarship pekmi siangngakchia hi Hakha College a kaimi deuh lawngte an si tiah kan theih.

About The Author

Na ruahning rak langhter ve.. (Leave a comment)

%d bloggers like this: