CACC Bawinu Foundation Nih Sianginn 40 Ah Fimcawnnak Kong Dothlatnak An Tuah Lai

Salai Cung Cung |2018 September26| Hakha CACC, Bawinu Foundation tawlrelnak in 2018 chungah Hakha le Thantlang peng Sianginn 40 ah fimcawnnak kong dothlatnak cu October thla thawk in an tuah lai tiah kan theih. Hi

Hi kong he pehtlai in CACC Education and Development Department Secretary Pastor Ram Nawn nih “kan rian tuannak cu 2016 in kan rak thawk cang, 2016 -2017 ah hin Hakha peng Sianginn 33 ah Siangngakchia le cachimtu cun an Sianginn data kan lak dih hnuah a herhmi Sianginn thilri phun hra kan bawmh hna. 2017-2018 ah hin Thantlang peng lei tiang kan chap i an zapi Hakha le Thantlang peng ah Sianginn 40 leng hi a herh mi data kan khomh lai. Cu a herh mi pawl kan lak dih hnuah bawmhnak kan tuah than lai. A bik in kan bawmh mi hna cozah primary Sianginn deuh ah hin le Laica a cawng mi Sianginn deuh ah kan bawmh hna”tiah a chim.

Hi an bawmh mi hna cu Siangngakchia caah lentecelhnak, Pumpululh, Cauk , Ballpain, cachimtu hna caah hman ding mi register tuahnak cauk pawl ti bantuk an bawmh hna hi a si. Tu kum Thantlang le Hakha peng hna ah October thla in a herh mi data an lak dih lai tiah theih a si.

“Abik in kan i timhmi cu a thilril in va bawmh sawh kha si lo in Lai tlang chung um cozah Sianginn kip ah Siangngakchia cachimh ning a thancho deuhnak ding le Siangngakchia fimnak le thiamnak lei ah an thluak thatdeuh nakding caah tuah a si. Cun Sianginn kai a za cang komi Sianginn kai lo in a um mi pawl le khuate lei um ngakchia Sianginn kai lomi pawl ca zong a tu hi dothlatnak kan tuah lai” tiah a chim chap.

Hi bawmhnak pek cangmi cu thilril phun 12 a si i a tangka in sing 2418.62 bawmhnak an pek cang hna. Camp Victoria Private Sianginn ah cachimtu minung pahnih zong ni hlawh an pek chih hna pinah Sianginn ca a herhmi thilril pawl zong bawmhnak an pek hna i rian zong pek zulh an i tim tiah kan theih.+++

Na ruahning rak langhter ve.. (Leave a comment)

%d bloggers like this: