CACC Nih Ceihbal Rih Lo Mi Laica Kongkau Ceihmainak An Tuah Lai

Pastor Lai Cung

Salai Biak Za Cung |2019 January 29| Hakha Chin Association for Christian Communication (CACC) Literature and publication Department hruainak in Lai holh le Laica kong kum fatin tuah tawnmi Laica ruatkhangtu tonpumhnak cu 2019 February 14 in 16 tiang an tuah lai.

“Hi tonpumhnak ah CACC nih a ceih ciami ceih lo in a thar in ceihkhannak kan ngei lai. Kan ceih ding pawl cu Laica kongkau, Laica tial ning, Lai holh pialmi pawl, Lai holh thanchonak, CACC nih a fehter cangmi ceihkhan ti lo in ceih bal rih lomi Laica kongkau a thar in kan ceih lai” tiah Pastor Lai Cung nih The Chinland Post ah a chim.

Hi tonpumhnak ah sawmmi hna cu Mara khua Malaysia um Pu C. Laiki le CCU in Saya Bawi Thawng an si. Hi Laica ruatkhangtu bu Committee hi minung 35 an si. A leng in Lawngtlai khua um Laimi pa 6 hrawng an ra lai. Cun Bangladesh um Laimi, Kalay, Yangon, tibantuk in a huam mi paoh an ra lai tiah kan theih.

“Hi tonpumhnak cu Hakha CACC zung ah kan tuah lai. Cun kan ceih dih hnu ah 2019 in Laica tial ning kong a thar in cauk kan nam than lai. Hi Laica kongkau tonpumhnak cu kumkhat voikhat tuah tonmi asinain tukum hi phundang deuh in le sunglawi deuh in ahlei in Laica tial ning kongah a thar chap dingmi pawl kan ceih lai. CBC US in Thlasui Tlaungneh zong kan sawm chih nain CBC US nih an rak thlah duh lo. Amah hi rak i tel kho ve seh law cu a tha chinchin hnga. Laica ruatkhangtu bu committee hi ramchung ramleng in tampi kan um i anmah le rauhnak pawl zong tutan tuah ding mi tonpumhnak ah an rak kuat khawh men” tiah a chim chap.

Laica tial ning cauk hi avoi 7nak tiang a chuak cang i tu hi avoi 8nak 2019 kum ah a chuak lai tiah kan theih.

Na ruahning rak langhter ve.. (Leave a comment)

%d bloggers like this: