CACC Nih Matupi Ah Siangcachim Cawnpiaknak An Tuah
TCP – Kalay | 2019 April 22 – Chin Association for Christian Communication (CACC) nih ṭhanchonak rianṭuannak ah a ngeihmi bu, ‘Bawinu Foundation’ tawlrelnak in Matupi ah Siangcachim pawl ṭhanchonak ding ah zarhkhat chung cawnpiaknak an tuah tiah kan theih.
Hi cawnpiaknak cu 2019 April 15-20 tiang an tuah. Matupi No. 1 Siangsangrun (High School) in cachimtu nu/pa minung 86 an kai kho.
CACC Bawinu Foundation nih cawnpiaktu ah an sawmmi hna cu Eden Pumtlamtlinglo Zohkhennak ah ṭuanmi Mai Ṭha Hlei Sung, Fidi Foundation (Chinland Post) in Salai Mang Hre Lian le Salai Khin Maung Thein le CACC in Pastor Ram Nawn hna an si.
Hi cawnpiaknak ah, Mai Ṭha Hlei Sung nih, Pumtlamtling lomi covo hoih in ‘Zapi Teltummi Fimcawnnak’ (Inclusive Education), Salai Mang Hre Lian nih ‘Fimcawnnak Covo’ (Right to Education), Salai Khin Maung Thein nih ‘21 Zabu chan ah Chinram Fimthiamnak le Pastor Ram Nawn nih ‘A dammi Pawngkam Zohkhenh Ning le Ngandamnak Kong’ an si” tiah cawnpiaktu pakhat nih Chinland Post ah a chim.
Cawnpiaknak thawknak ah, Pu Ro Thang (Assistant Township Education Officer) le Pastor Ram Nawn nih biatawi chimnak an ngei i Matupi No.1 High School Sianguk (Headmaster) Pu Duh Tling zong nih an telpi hna tiah kan theih.
Bawinu Foundation Director Pastor Ram Nawn nih “Bawinu Foundation tawlrelnak in sianginn cachim hna sin ah cawnpiaknak kan tuah hi kum khat voikhat in a si. A dang Fimcawnnak lei rianṭuantu upa le Siangngakchia komh in Ceimaiṭinak (Workshop) hi kum khat voikhat kan tuah. Cun, Nu Ṭhanconak (Women Empowerment) le Pawngkam Zohkhenhnak (Ecology) kong zong hi biatakte in cawnpiaknak ah kan hmaithlakmi a si. Hakha le Thantlang i cachimtu nih an cachimhnak ah an hman dingmi thilril (Material) phun tampi, ngakchia lentecelhnak phunphun, cauk, cafung tiah phun 24 leng bawmhnak zong kan tuah tiah Chinland Post ah a chim.
Bawinu Foundation hi CACC nih ṭhanchonak rianṭuan ding ah 2015 November 15 dirhmi a si.
2016 in Fimcawnnak le Thanchonak (Education & Development) ah Chungṭuan (Secretary) le Bawinu Foundation ah Lutlai (director) a ṭuan lio mi Pastor Ram Nawn nih, “Foundation an rak thokka hrawnghrang ahhin Biaknak lei bawmhchanmi chawva in ṭhanchonak tuahṭuan hi an rak i harh pah ruang ah CACC nih Bawinu Foundation hi Chin ramkulh huap cozah theihpinak (register) a tuah i Chin miphun a lamkip in ṭhanchonnak hi a timh bik mi a si” tiah Pastor Ram Nawn nih a chim chap.
Chin Association for Chrisitan Communication (CACC) cu Biaknak bu kip fonh in Chin miphun (Lai) caholh le nunphung kilveng ding ah 1988 ah rak dirhmi a si. +++