‘Caholh dawh lo’ Nih Mi A Molh Ter

‘Caholh dawh lo’ Nih Mi A Molh Ter

Salai Van Bawi Mang

Kan theih cio bang, kum zabu 21 ah Laimi kan i funtomnak bik cu maivan (online asiloah internet) chung hi a si ti ahcun kan palh tuk lem lai lo dah. A hlei khun in, social media chung Facebook hi a si. Laimi nih Facebook kan hmannak hi kum hra bu (one decade) lei a hun phan deng ve cang.

Facebook nih Lai caholh thanchonnak tam ngai thathnemnak a chuahpi bantuk in kan khuaruahnak lei zong a hun hnursuan ngaingai ve. 2016-17 hrawnghrang in Facebook lei nih ‘instant ads’ in phaisa hlawhnak a hun ser tikah Laimi chung in ‘catial buk’ ser le website tam ngaingai an hun chuak. Thawngpang tialnak, biaknak, ngandamnak le a dang theihtlei tete an karh ngaingai. Laica tein carel awk, theih hngalh kaunak (knowledge) tam ngai kan hmuh lai tiah ruahchan a si. Caholh a thangcho lai tiah ruah a si. Mahbel, ruahning in thil a rak kal tawn lo.

Lai caholh in maivan chung ah thawngpang a tialmi pawl an cahmai website hi 2017 in khomh hram ka thok. Nikum 2019 ah ka van zohnawh (updated) than i website 80 leng ka khomh khawh hna. A nung ti lomi cheukhat website zong a um ve len nain a thar serchom mi website zong an karh ngai. Tam deuh hi zoh hna tikah, ‘caholh dawh lo’ in tialmi tamtuk an um.

‘Caholh dawh lo’ timi nih a ngeihmi sullam cu, “zapi caah, mah le Miphun thanchonak he aa rualtlak in theih hngalh kauhnak (knowledge), fim chimhnak (educate), a hlankaan in mipi sinah theihternak le ralrinnak pek (inform) le mipi tuammuai le lawmter (entertain)le thathnemnak a chuahpi  lomi caholh tialmi pawl kha a sawh duhmi a si”.

Cu bantuk ‘Caholh dawh lo’ tam taktak te a karh tikah, ka zaatlang bu kha a zawtter. Ka zaatlang bu a zawt, ngandam lo tik ahcun, kan Miphun ningin kan zaw. Kan molh.

Tahchunhnak ah, Facebook in van zoh hnik usih. Tulio Covid-19 pulrai zawtnak rungrul caan cu inn ah i erh cio a si. Facebook cu khulrang tein thawngpang (information) kan hmuh khawh le theih khawh caah tam ngai nih kan irinh. Cu ve bantuk in, mipi nih kan i rinh ngaingai Facebook chung ah ‘Caholh dawh lo’ in tialmi cu a hleikhun in an karh. A hmu mi poah nih rel duh hna seh tiah, lemsoinak in tial. Cu pawl ko cu, van hmeh ta lo le van lonh tak dingin um cu mi siarem tawn lo ti asi.

Cu ‘coholh dawh lo’ mi hna cu nifatin in kan rel, kan thluak ah kan rawn. A hnu ah cun, kan zumh beh cang ai. Theih hngalh kauhnak zong a pe lo i, fim thiamnak zong a um lo mi ca hna nifatin in kan rel, kan thluak ah kan rawn i kan izumh ahcun, a zawmi Miphun ah kanmah tein kan i ser chuah. Cun, mipi caah thathnemhnak pek le tuaimuai nuamter siloin lungretheihnak a pe tu ‘caholh dawh lo’ hna rel peng ah cun, a kan molh ter chinchin. Fim thiamnak le hngalhnak cu ‘ca’ ah a um an ti bang; theih hngalhnak i chap deuh ning, theih a herhmi le zulh a herhmi nuncaan ziaza hna hngalh deuh ning ti bantuk thathnemhnak caah dawh ‘ca’ cu rel a si.

Cucaah, Laica tialtu nih ‘caholh dawh lo’ hna tial cu na careltu hna, ‘molh ter le hruh ter’ kha a si. Cu ve thiamthiam in, careltu nih ‘caholh dawh lo’ in tial mi cabia, caruk pawl cu kuktlaih in rel peng ahcun thanchonnak cu kanmah caah a si hnga lo.

Na ruahning rak langhter ve.. (Leave a comment)

%d bloggers like this: