Carson Hall Cu Ks. Sing 5000 Dih In A Thar An Sak Than Lai

Carson Hall

Salai cung|2018 April 26 | Chin ramkulh Hakha ah a ummi Carson Hall cu a hlunh tuk cang caah ks. sing 5000 dih in a thar an sak than lai tiah kan theih.

“Hi Carson Hall cu Rev. David Ngun Thawng Mang General Sectary a rak tuan lio ah khan rak sak asi i tu hi kum tampi a kal cang. Hall zong a hlunh ngai cang caah an rawk, an zut len cang caah athar in sak than kan timhnak hi asi. Hi Carson Hall athar sak thanmi hi kumthum chung timhtuahnak kan ngei lai. 2018-2020 ah cun sak khawh kan i zuaam lai. Tukum le hmaikum ah HBA nih tangka a ngeihmi hnihchunh khawmh in le cun HBA local area in pumpak lungtho mi le thazaang chuah khomi paoh kha lenkai in bawmh hal an si lai. Tukum le hmaikum hi cu bawmhnak hal in le thilri a herhmi tete zalh in kan cawlcang rih lai i inn dirh taktak hi cu 2020 chungah asi te lai” tiah HBA GS J. Nawl Cung Lian nih The Chinland Post ah a chim.

Hi Carson Hall sak than nak ah hin Rev. Simon Thawng Hmung nih tha deuh in design le estimate a tuahpiak i ks. sing 4000 le 5000 kar lak hi a dih lai. Hi Carson Hall thar saknak ding caah hin ramleng ummi Chinmi sin ah bawmh hal an tim hna lo Abik in ramchung HBA area in pumpak in le ramleng zongah an pale an simi hna pumpak le khirfa hruaitu hna, cun US lei Laimi hruaitu hna ton le ruahnak cheuhmi le cun anmah le si khawh chung pumpak in thazaang a chuahmi zong an um ve lai. Cu chung in cun an tuah lai. Tubantuk in bawmh va hal si lo in anmah HBA ramchung fanau le pawl lawng si lo in Carson min a pumi kanmah ta tiin a ruat khomi paoh nih hin anmah le si khawh chung in kan bawmh ve lai a timi zong tampi an um ve tiah kan theih.

Tu lio tangka kan ngeih mi hi local area in le pumpak chungin zeihmanh kan hmu rih lo nain kanmah HBA chungin hin sing 400 hi sak nak dingah kan ngei. Hi saknak dingah cun kanmah HBA le local rea pawl nih sing 1000 cu kan chuah khawh ding timh tuahnak kan ngei” tiah HBA GS J. Nawl Cung Lian nih The Chinland Post ah a chim.

“A herh ah cun lei zong kan ba ko lai, kan bat ko zong ah hmailei pi ah va cham than te ding asi ko caah HBA ramchung nih thazaang kan chuah ko lai. Hiti kan tuah ah cun ramleng HBA fanau nih a kan bawmh te ko lai tiah ruahnak kan ngei” ti zong a chimchih.

Hi Carson hall sak cu tangka tlamtling ko ahcun thla 6 in kumkhat chungah cun an lim khawh ko lai ti an ruah. Hi saknak caah company lei nih tuanvo lak lo in kanmah nih Carson Hall building committee a simi Rev. Simon Thawng Hmung nih biatak tein tuanvo a laakpiak hna lai. Amah tawlrelnak in inn satu ding cu tuanvo pek an si te lai tiah kan theih.

Na ruahning rak langhter ve.. (Leave a comment)

%d bloggers like this: