Cathanh: Hakha Khuahlun Kokek Ram Ngeitu Lungput
The Chinland Post| 2019 August 6| Hakha ram ti mi cu khua chingchan khua 16 hna karlak ah a ummi a si. Cu Hakha ram timi cu kan pupa chan in fei le nam he an nunnak thap in an rak kilvenmi le an rak zohkhenhmi khua le ram a si.
Hakha nih pupa ram timi phung le lam, sining ngei tein khuakhan lairelnak an ngeih i an ral tawlrelmi a um. Pupa ram timi ah ningcang lo, sining lo in an rak tawlrel bal lo. Sining le kal ning tang ah an rak tawlrel mi a si. Cucaah pupa ram timi cu phun thum in a um:
- Pupa tlangram: Khua chingchan hna he kan ramri vialte khi Hakha ram, pupa tlangram, fei le nam he an rak dirkamhmi cu a si. Cun Rungtlang a zapi tein pupa tlangram a si, Ngauthu tlang zapi zong khi pupa tlangram a si dih. Rungtlang in a rung tolh i Cawbuk in Lungtatchiahrawn a kiangkap, nawi in hringai in cerhpar in arzau tlang in, nuṭhut in thel ṭongva in hringsih tiang khi Hakhapi tlangram a si dih. Naa laileng le saṭil tlonnak ah an rak chiahmi a si. Haithlan zong khi a zapi in tlangram a si dih.
- Pupa tlangram (Mi bu hme deuh nih ngeih mi): Loklung cu lo an thlawhnak in an um beh, Mangnu le Khuabe zong lo an thlawhnak in an um beh, cu bantuk in Hakha ram chung ah a um mi khua dangdang zong an um ve. Cawbuk khi mirang nih kala an rak kaipi hna i cu kala cu saṭil zuat an duh caah Hakhapi kan bawi le kan tlang an rak hal hna i kala pawl kha an rak pek mi hna a si. Hi khua hna hi pupa chan in Hakha Khuahlun lairelnak tang ah a ummi an si.
- Pupa ram (Pumpak pupa ram, thlawh ram): Pupa chan in pumpak nih an rak ngeihmi ram a si. Pupa chan in lo ah an thlawh i an tefa zong nih pehzulh in atu tiang an thlawh ṭuan cuahmah mi ram a si. Hakha nih pupa ram kan ngei hrimhrim ti a langhnak cu nupi an ṭhit, va an ngeih tik ah zolo pakhat, lai lo pakhat i manh a rak si. A donghnak bik i ram aa man mi cu Ram Ki man ah khin zuk ruk kahnak khi Tha Hnin pa an rak manh, cun amah Tha Hnin pa nih Ngun Ham sin i a zuarmi zong khi man ah an rak pekmi a si chih. Cucaah pupa pumpak ram hi a um hrimhrim ti a lang. Mah ti khan kan pupa nih ram an rak zohkhenh ning a si.
Hakha Khuahlun kokek ram ngei cu 2019 August 4 ah tonnak kan ngei i a tanglei bantuk in bia kan fun:
- 2019 July 31 ah Pupa ram ngei tiah aa ti i lam zawh in duh lonak an langhtermi cu kannih Hakha Khuahlun kokek ram ngeitu taktak (Zatuak 95%) kan lungput a si lo.
- Kan pupa tlangram (Sathek telh chih), kan pumpak pupa ram, zei bantuk kan ram pohpoh bu pakhat khat nih siseh, pumpak pakhat nih siseh, hman an herh ahcun Hakha Khuahlun kokek ram ngeitu le thingram Committee he zoh in hnatlaknak ngeih hnu ah hman ding.
Hakha Khuahlun Kokek Thingram Ngei
About The Author
