CCERR Nih Paletwa Ralzam Caah Tlawmhal In Bawmhnak An Pek Lai
Salai Cung Cung|2019 February 7| Community Care for Emergency Response and Rehabilitation (CCERR) tawlrelnak in Paletwa ralzaam pawl bawmhnak pek an timh hna.
“Kanmah Chinmi hi bantuk harnak an ton tikah cozah, NGO lei zong in bawmhnak cu an peek ko hna nain an i za lo. Cucaah kanmah CCERR nih bawmhnak kawl in kan vun tawlrel. Chin ramkulh Paletwa telh lo in peng dang sin ah bawmh kan hal hna. Kanmah CCERR min lawng langhter lo in a bawmchantu min zapi hi anmah Paletwa ralzam sin pek tikah langhter chih a si lai. Hi bawmhnak pekmi zapi kan hmuh dih in kanmah CCERR member chung pumpak in Paletwa ah kan va kal lai. Tubantuk Paletwa ralzaam caah bawmhnak halmi cu 2019 January in kan thawk” tiah CCERR Data Admin le Hot Line Manager Philip Nun Uk Thang nih The Chinland Post ah a chim.
“CCERR nih Paletwa ralzaam bawmhnak caah tiin bawmhhal mi Tongzang- TTBA in Tangka ks. 116, 00 le Falam in 50,000 kan hmuh cang. Peng dang pawl cu an tawlrel cuahmah lio a si. Thantlang, Mindat, Matupi, Tedim, Falam tiin February thla chungah an rak khawlh cio hna lai. Kannih Hakha hi Khirhbu kip ah thawng kan thanh lai i Hakhathar Nubu nih tangka hi an khawlh lai. Hi bawmhhal ah mah le peng cio tawlrel ning cu Tonzang ah TTBA, Falam ah FPM, Thantlang ah Chin Family Group, Mindat ah CYO, Hakha ah Hakhathar nubu tibantuk in an kawl lai” tiah CCERR Liaison Officer Biak Mawi Sung nih The Chinland Post ah a chim.
“Paletwa lei hi kahdohnak a chuah peng caah anmah le inn le lo ah tha tein an um ngam ti lo. Cun rian zong tha tein an tuan khawh ti lo caah hi tluk harnak an tonnak lio ah hin zoh sawhsawh lo in mah le si khawh tawk in bawmhnak rak pe cio hna usih” tiah Phillip Nun Uk Thang nih a bia peh ah a chim.
CCER cu 2015 Hakha kokek hartonnak in Laimi ramkhel lei bochanmi le Biaknak lei upa he tonpumhnak ngeih hnu ah an rak dirhmi a si. Hakha, Yangon le Sittwe ah zung an ngei. A bikin an rian tuanmi cu kokek harnak tongmi bawmhnak pek le plastic in thilpuan tahning an cawnpiak hna tiah kan theih.
About The Author
