CCI Nih Chin Miphun Ni Ah Hlasa Ding In Sawmmi Sung Tin Par Visa A Ngah Lo
Tawk Tling Thang| 2019 February 7| 2019 kum Chin National Day (CND) ah hlasak ding in Chin Community Of Indianapolis (CCI) nih Myanmar rammi hlasak thiam sawmmi lak chung in Sung Tin Par visa a ngah lo tiah kan theih.
Hi kong he pehtlai in hlasak thiam Sung Tin Par nih, “Tukum Chin Miphun Ni cu US lei ah hman ding in CCI upa hna nih an kan sawm. Asinain, visa ka zok i ka ngah lo caah ka kal kho than lai lo. Keimah ka ngah lo ruang ah ka naule dang zong visa ngahding an bei a sei lo i an sok ti lo. Cucaah kan kal kho than lai lo. Atu hi Malaysia ah private in an kan sawm i hlasak thiam Naw Naw he hlasaknak kan ngeih cuahmah lio a si. A tumtu hi kanmah Chinmi an si” tiah February 7 zanlei The Chinland Post ah a chim.
Hi kong he pehtlai in Ni Len Par Mawi nih, “US lei kal ding in an kan sawm ko nain kan u Sung Tin Par kha visa a sok i a ngah lo. Amah hmanh a ngah lo cun, kannih a kal bal lomi cu kan ngah hlei lai lo ka ti caah ka sok ti lo. Nihin February 7 ah visa va sok ding cu a si nain ka kal lo” tiah The Chinland Post ah a chim.
CCI upa hna nih tukum Chin Miphun Ni ah hlasa ding ah Myanmar lei in an sawmmi hna cu Chaw Suh Khin, Thang Paa, Ni Len Par Mawi, Sung Tin Par, Fred Hlim Puia an si. Thang Paa zong hi visa a sok i a ngah ve lo. Cucaah, aho hmanh an kal kho than lai lo tiah kan theih.
About The Author
