CDF-Kanpetlet le SAC ralkap hmun 3 ah kahdohnak a chuak, SAC ralkap 16 an thi

The Chinland Post | 2022 June 13 – Chinland Defense Force – Kanpetlet le SAC ralkap karlak ah kahdohnak pehzulh in a chuak lengmang i SAC ralkap lei in a thimi an tam tiah CDF-Kanpetlet nih a thanh.

June 10 lioah SAC ralkap pawl nih hmunhma an khuarnak CDF-Kanpetlet battalion 2 (Vakok) sakhaan ah June 12 ah kahdohnak a chuak ṭhan, SAC ralkap pawl nih Vakok sakhaan cu an khangh i an kir hnuah kahdohnak a chuak ṭhan, Kahdoh a chuahnak Kyawtaw le Anpung khua mipi hna zong himnak ah an zaam tiah theih a si.

Vakok sakhaan, Kyawtaw le Anpung khua kahdohnak hna ah SAC ralkap lei in a tlawmbik 11 an thi i tampi nih hliamhma an tuar tiah a langhter.

Kahdohnak hmunhma pawl ah SAC ralkap bawnhnak an phak khawhnak hnga lo Kanpetlet khuachung, General Administration zung ah hmunhma a khuarmi SAC ralkap pawl cu  CDF-Kanpetlet nih an kah hna caah ralkap 5 an thi i hliamhma a tuarmi an tam tiah theih a si.

June 12 kahdohnak chungah CDF-Kanpetlet lei nih hliamhma tuar lo tein an kirtak khawh hna tiah theih a si.

SAC ralkap pawl cu kahdoh a chuahnak pawngah a ummi Anpung khua ah hmunhma an khuar i khua inn hna an bauh, innzuat saṭil hna an thah i an ei lengah a dir sawhsawhmi cycle pawl zong an khangh tiah theih a si.

Cun, CDF-Kanpetlet battalion 7 a umnak hmunhma ah kahdohnak a chuak ṭhan i SAC ralkap lei in a thimi an tam tiah a langhter.

CDF-Kanpetlet le SAC ralkap karlak ah kahdohnak a fak kho pengmi a si caah mipi hna nih CDF thawngthanhning tein umṭhut ding in a thanh chih fawn.

Na ruahning rak langhter ve.. (Leave a comment)

%d bloggers like this: