CDF-Kanpetlet nih Headquarter an zaam tak chung
The Chinland Post | 2022 March 17 – Chin ramkulh, Kanpetlet pengah hram bunh a simi CDF-Kanpetlet le Ralhrang SAC ralkap karlak ah 2022 February 7 in March 16 tiang kahdohnak a chuak peng.
2022 March 11 ah Kanpetlet khua in thazang 200 hrawng nih CDF-Kanpetlet Headquarter lei ah tuk ding in a raami SAC ralkap le CDF-Kanpetlet karlak ah kahdohnak a chuak i ralhrang SAC ralkap 3 an thi tiah CDF-Kanpetlet nih a thanh.
Cun, March 13 ah Ngunglaung khua chaklei Ampon khua chaklei ah SAC ralkap le CDF-Kanpetlet, CDF-Mindat, Yaw PDF, The Youth Force le Saw-PDF hna he ram tangah kahdohnak a chuak i SAC ralkap 2 an thi i CDF-Kanpetlet in mipi hriamtlai 2 an i hliam.
March 14 zongah kahdohnak faakpi a chuak i ralhrang SAC ralkap lei in a thimi zat theih khawh a si rih lo tiah theih a si.
2022 March 15 ah CDF-Kanpetlet, CDF-Mindat, Yaw PDF, The Youth Force le Saw-PDF phufonh hna le SAC ralkap karlak ah zing sml 8:00am-3:00pm tiang kahdohnak a chuak i CDF-Kanpetlet in mipi hriamtlai pakhat a nunnak a liam i pahnih nih hliamhma an tuar than tiah an thanh.
Cu kahdohnak ah Mindat khua chungah hmunhma a khuarmi ke ralkap Light Infantry Battalion (LIB) 274 battalion le Kyaukhtoo ah a ummi meithal ngan (artillery) phu hna nih hriamngan in kah an bomh hna caah Sammathar khuahlun mipi inn 9 a khen i a kang tiah thawng an ṭial.
CDF-Kanpetlet lei in kuanfang i zaat lo ruang, hriam thazaang aa dantuk ruang, khuami hna a hnawrsuan sual hna lai ti phan ruang le thazang tamtuk in kahdohnak an tuah ruangah CDF-Kanpetlet Headquarter cu an zaamtak chung tiah CDF-Kanpetlet cathanhnak in thawng theih a si.
Cucaah, ramchung, ramleng mipi hna le donthlennak a bawmchantu hna nih hriam thazang le kuan tampi nan kan bawmhnak lai zanfah kan in nawl hna tiah bawmhhalnak zong an telh chih.#
About The Author
