CDF-KKG, CDF-Thantlang, PDF-Kalay le RKDF bawm in Kalay le Gangaw Peng Kahdohnak

0

Post staff | 2022 February 24 — Kalay peng thlanglei, Kyanthar khua le Gangaw peng, Hanthawaddy khua ah hmunhma a lami ralhrang pawl le Pyu Saw Htee phu thazang 70 hrawng cu phu hnih ah ṭhen in Hmandaw khua leiah raltuk dingin an i timh lioah CDF-KKG, CDF-Thantlang, PDF-Kalay, Ranger Kalay Defend Force (RKDF) le mipi hriamtlai phu hna he an i ton caah zinglei sml 10:00 am hrawngah kahdohnak a chuak.

Ralhrang phu pawl cu a hlan bantukin Pyidawngsu lamcung in rat loin ramlak lei in Hmandaw khua hnulei ah an rak lut.

Mipi hriamtlai phu hna he sml 2 tluk kahdohnak a chuak. CDF-KKG nih kan hmanhmi bom pawl an i pah sual ruang le mipi hriamtlai phu nih hriamngan he hme he kan kah hna caah ralhrang pawl hnu an kir ṭhan tiah CDF-KKG nih February 23 ah a thanh.

Cu kahdohnak ah ralhranglei in pa zeizah an thih cu a fiangin chim khawh a si lo nain 6 nak tlawm lo cu an i hliam lai tiah an ruahdamh tiah theih a si.


Mipi hriamtlai lei in aa hliammi an um lo i kahdohnak pawngkam hrawngah zohfelnak kan ngei tiah a thanh.

February 22 zong ah, Gangaw le Pya khua karlak i ralhrang pawl hmunhma an khuarnak cu CDF-KKG battalion-5 nih hriamngan in an kah hna hnu ah him tein hnu an kir kho ṭhan.

Cun, Kalay peng Yangyiaung khua ah hmunhma a khuarmi ralhrang pawl cu February 23 ah Thanpho khuachung ah lut in mipi inn, facang rialnak le cycle pawl an khangh piak hna.

CDF-KKG battalion-3 le mipi hna bawm in mei an thah len ko nain inn 2 le cycle 1 a ciam tiah CDF-KKG nih February 23 ah thawng a thanh.#

About The Author

Na ruahning rak langhter ve.. (Leave a comment)

%d bloggers like this: