Central Bank Vice Chairman kan kah tiah mipi hriantlai phu pakhat nih a thanh
The Chinland Post | 2022 April 7 – Central Bank Vice Chairman Daw Than Than Swe cu Yangon ramṭhen, Bahan peng a ummnak inn ah meithal in April 7 zing ah mipi hriamtlai phu pakhat nih kan kah tiah Mizzima ah a chimh hna.
Shwekoneyeikmon innrual, inn 5 nak a khaan 14 ah kum 55 a simi Daw Than Than Swe cu zing sml 11:30am hrawngah meithal in voi 5 kan kah i a paw le a phei a khen tiah Mizzima ah a chim.
“A umnak khaan innka hram ah voi 5 kan kah. A paw le a phei a khen caah a thi ko lai” tiah min langhter a duh lomi mipi hriamtlai phu hruaitu nih a chim.
Daw Than Than Swe cu va ngei lomi a si i a tunu he an um tiah Central Bank thawngzamh nih a chim.
“Rianngeitu hna kha kum dongh budget khar hlan ah ngunkhuai pek ding in a hnek hna caah” tiah a thattu phu nih Mizzima ah a chim. Thil sinning fiang tein chimding bal a duh lo.
Central Bank rank cu Deputy Minister he aa tluk. Daw Than Than Swe cu Accounting Department, Audit, Department of Banking Relations, Research le Information Department hna a tlai chih tu a si.
A tulio ceihmai a si ngaimi SAC nih fial ruangah Central Bank tangka he aa pehtlaimi phung thlennawmnak kong he Daw Than Than Swe hi pehtlaihnak a ngei lo tiah theih a si.
April 3 ah Central Bank nih a thlenmi phung chungah Myanmar ram chungah a ummi vialte nih ramdang in ngahmi tangka vialte kha Myanmar ram chungah kuat ṭhan in License a ngahmi ramdang tangka thlen khawhnak bank pawl ah USD $ 1 ah 1850 MMK in thlen le zuar a si lai tiah aa tel. Mah rian cu Central Bank ah Vice Chairman a ṭuan vemi U Win Thaw nih a tlaih.
Japan ram ah MBA a kai i World Bank ah kum 2 rian a rak ṭuan balmi Daw Than Than Swe cu Department chung ah “a bo tukmi” tiah an auh i a bia chim a hran tuk ruangah a huami an tam tiah Central Bank thawngzamh pakhat nih Mizzima ah a chim.
Meithal hma ruangah sizung pakhat ah aa thlopbul lio a si tiah SAC biachimnak nawl a ngeitu Major-General Zaw Min Htun nih thawngzamh pawl sin ah a chim.
About The Author
