Central NLD Party Thlenremhnak An Tuah; Dr. Zaw Myint Maung Nih A Hruai Cang Hna Lai
City Hunter| 2018 April 2| Central NLD (National League for Democracy) party ah khuahun le CEC phu thlenremhnak an tuah i Dr. Zaw Myint Maung nih a hruai cang hna lai.
March 30 ah an thanhchuahmi NLD party khuahun phu karhchapnak telh in CEC i thithruainak ah a um bal rih lomi Vice Chairman hmunhma pahnih an hun telh chap. Cu hlan vialte NLD party CEC committee ah Chairman lawng a um lo, Vice chairman a um bal lo.
Chairman ah Daw Aung San Suu Kyi, Vice Chairman ah U Win Myint le Dr. Zaw Myint Maung an si. Tu lio ah Daw Aung San Suu Kyi le U Win Myint cu cozah rian tuanvo an lak ruang ah party cu Dr. Zaw Myint Maung nih a hruai lai tiah NLD in chimnak nawlngeitu nih a chim.
“A biapi in hi vice chairman pahnih kan hun telhnak cu Daw Aung San Suu Kyi nih tuanvo a laak dih hnu ah amah a chawngtu ding le tuanvo latu ding langhngante in hmuhsak kan duh caah atu bantuk in kan langhternak hi a si” tiah party in chimnak nawlngeitu Dr. Myo Nyunt nih a chim.
Daw Aung San Suu Kyi hnu ah anmah pahnih hi vice Chairman an si ko nain anmah pahnih hi Vice Chairman an si peng lai tinak a si lo. A herh ning in thlen khawh than an si. Party ah tuanvo laaknak remhnak, CEC cu anmah nih hruai ding, meeting tuah tik i party policy chiah tikah an hruai khawhnak ding caah tuahmi a si” tiah Dr. Myo Nyunt nih a chimchih.
Thura U Tin Oo nih khuahun (na-yah-kah) phu cu a hruai hna lai. Chungtel hna cu; U Hla Phe, U Win Htein, U Ung Gyaing, U Kyaw Khin le U Man Joni an si.
NLD party chimnak nawlngeitu zong minung pakhat lawng an rak ngei lengmang nain atu cu minung pahnih in an chiah cang hna. Cucu; Dr. Zaw Myint Maung le Dr. Myo Nyunt an si.
Ref: BBC
About The Author
