CFL Pumpululh Zuamnak Ah Thiamhlei Laksawng Sing 5 Pek An Si Lai

Salai Cung Cung |2018 December 2| Chinland Paih Championship (CPC) tawlrelnak in tuah dingmi Chinland Futsal League (CFL) pumpululh chuih zuamnak ah zaanglek celhthiam bik minung pakhat thim i laksawng ah Sing 5 pek a si lai tiah kan theih.

“Hi futsal chuih zuamnak ah hin thiamhlei minung pakhat kan thim lai i laksawng ah Sing 5 pek a si lai. Zeitindah kan thim lai ti cu fiang rih lo. Pumpululh an chuih chung vialte zoh in pek awk a tlak ko tiin thimmi minung pakhat, Coach lei in maw asiloah mizapi lei in maw asiloah leader tibantuk nih an zoh hna lai i a thiambik minung pakhat an thimmi kha pek a si lai” tiah Salai Lungthli Tum nih The Chinland Post ah a chim.

Hi pumpululh chuih zuamnak cu Groups 8 in an then. Group (A) in Brothers, Dawrhlun Tilim, BE Young Star, Group (B) in Dawrhlun Vazuun, Leitak Siapanglai, Loklung, Group (C) in Chin Oo Sii, Khuathar Foundation, Sakta, Groups (D) in Zokhua, Lungphun, Kuchah, Group (E) in Hakha Zophei, Dinlopa, Hakhathar, Group (F) in Lautu, Hniar Lawn, Tinam, Group (G) in Vawngtu, Meithat Tu, Lungler, Group (H) in Bright Star, Zophei, Bethany an si. A zapi phu 24 an si tiah kan theih.

“A lut ding hi phu 24 an si cang caah a thar kan cohlang ti hna lo. Pumpak phu tam nawn lung tha lo ngai in kan khirh hna. A ruang cu phu 27 hna an si sual ah cun Group then tikah hna a hnawh tuk caah kan khirh hna. Hi phu 24 lak in tamdeuh cu pengtlang, khuate, Innsang le Bu awiawh mi an si. Group kan thenmi fehter a si rih lo, tlawmpal ah thlenremhmi zong a um te kho” tiah a chimchap.

Salai Lungthli Tum nih 2019 chung ah Paih zuamnak le Pumpululuh chuih zuamnak zong hinak sunglawi deuh in tuah than ding timhtuahnak a ngei tiah kan theih. +++