Rung Lian Ceu; Champion Ka Co Lonak A Ruang Bik Cu Kan Paih Phunglam Aa Khah Lo Ruang Ah A Si
The Chinland Post| 2019 March 7| Nagaland khualipi Kohima khuapi ah tuahmi avoi 12nak Naga zuamcawh paih ah Rung Lian Ceu nih champion ka co lonak a ruang bik cu kan paih phunglam aa khah lo ruang ah a si tiah The Chinland Post Biaruahnak (Interview) ah a chim.
Ruang Lian Ceu cu Nagaland state khualipi, Kohima ah tuahmi avoi 12nak Naga zuamcawh paih ah pathumnak laksawng le paih thiam bik laksawng lawng a co. Aa Paih hlan ah champion co ding zakhat ah zakhat bak aa zumh nain a sung. Hi kong ah The Chinland Post nih live in biaruahnak kan ngeih i atu bantuk in a kan leh.
“Tutan ah champion co ding in zakhat ah zakhat bak kaa tinh in kaa ruahchan ko nain ka ngah lonak a ruang bik cu kan paih phunglam aa khah lo ruang ah a si. Kan i paih sual lai ti kan phannak ah kan sung theu. Hakha lei ka hawile an sunghnak a ruang bik cu paih phunglam fiangte in an hngalh lo ruang le kan i paih bal lomi phunglam a si tikah an i ralrin tuknak ah an thinphang i an sunghnak a si. Asinain, tutan ah champion ka co lo zong ah kaa lungsi tuk ko, hi tluk dirhmun kan phak khawh ruang le tuanbia thar kan tial a si ruang ah” tiah The Chinland Post ah a chim.
Hikah Round of 16 aa paihnak video zoh khawh a si.
Rung Lian Ceu nih pathum laksawng anmah India tangka in Rs. 100,000 le Paih thiam bik (the best tactic wrestler) laksawng ah Rs. 10,000 a co. Kawlram tangka in cun Ks. Sing 22 (2,200,000) tluk a si.
Champion cotu hi Menuosetuo Yiese a si, Rs. 200,000 a co. Pahnihnak hi nikum champion Venuzu a si, Rs. 150,000 a co. Chinmi minung 5 an i pai i Tluang Zel Thang le Thawng Tling hi minung 62 paih a round khatnak ah an sung colh. Mang Hnin Thang le Hrang Tin Thang hi minung 30 paih, a round hnihnak an sung. Rung Lian Ceu cu semi final tiang a kai i pathumnak a co.
Tutan Naga paih ah Chinmi minung 17 an kal kho. Chin Miphun nih miphun dang le ramdang ah a hmasa bik kan i paih a si tiah kan theih.
About The Author
