Chaungngyi Phungki Sianginn Kahdohnak Ah SAC Ralkap 10 An Thi, Mahliang SAC Ralkap Sakhaan Drone In Bom An Thlak I 8 An Thi
The Chinland Post | 2023 June 7 — Taninthary peng, Chaungngyi khuate phungki sianginn ah hmunhma a khuar mi SAC ralkap pawl an kah hna i SAC lei 10 an thi tiah KTLA-TCJF nih a thanh.
June 6 chun sml 2:00pm hrawng ah Chaungngyi phungki sianginn ah hmunhma a khuar mi SAC ralkap 30 leng cu PDF phufonh pawl nih an kah hna i 10 nak tlawn lo an thi tiah theih a si.
Cun Mandalay ramṭhen, Mahliang peng ah a um mi SAC ralkap pawl Drone in bom lung 3 an thlak hnawh hna i SAC ralkap 8 an thi tiah Natogyi PDF nih an thanh.
June 5 chun sml 1:00pm hrawng ah Mahliang peng, Thayatkaungpin khuate ah hmunhma a khuar mi SAC ralkap pawl Drone in bom lung 1 an thlak hnawh hna i an rawl einak buk chung ah a tlak caah SAC ralkap 5 a hmun ah an thi tiah theih a si.
Cubantuk in Mahliang peng, Natoegyi-Mahliang lamcung, Suyit khuate ah gate tuah in mipi sin ah tangka a hal mi SAC ralkap pawl Drone in voi 2 bom an thlak hnawh hna i 3 an thi tiah theih a si.
Kahdohnak chung ah Natogyi PDF, Myingyan pengkomh No. 4 Battalion le Myingyan District Drone Strike Team hna fonh in kahdohnak an tuah hi a si.
About The Author
