Chief Minister Zapi Naypyidaw Ah Lakhruak Meeting An Auh Hna Timi Hi Thawngpang Diklo A Si Lai Minister Pu Sui Thio

0

Minister Pu Sui Thio le Chief Minister Salai Lian Luai

City Hunter| 2018 May 16| Myanmar ramchung Chief Minister zapi Naypyidaw ah lakhruak meeting an auh hna tiah a luancia suimilam 19 ahkhan Tomorrow News Journal nih a thanh. Hi kong he pehtlai in Chin ramkulh Lam le Sul lei pehtlaihnak minister Pu Sui Thio nih atu bantuk in The Chinland Post ah a chim.

“Chief Minister zapi Naypyidaw ah lakhruak in meeting an auh hna timi cu thawngpang diklo a si lai. Atu hi (May 16 sml. 9:00am)  hluttaw Speaker le minister dang telh in Chief Minister he Kalay ah kan um ko. Vice President Henry Van Thio Chinram a tlawng hnik i don ding ah Kalay in kan hngak ko. Chief minister meeting an auh le auh lo cu ka hngal lo, asinain lakhruak in meeting an auh tak a si ko ahcun atu hi kan sin ah a um ti hnga lo. Vice President a khuallam vialte zong Chief Minister Salai Lian Luai nih zulh a timh ko. Nihin hi Vice President cu Kalay a phan lai i Kalay in Tonzang ah kan lan colh lai i tuzan hi Tonzang ah kan riak kho men” tiah May 16 zingka, The Chinland Post ah a chim.

Kan hnuzarh ahkhan Chief Minister Salai Lian Luai rian an phuah lai tiah media cheukhat nih hechet thawng an zamh. Kha zong kha a dik lomi a si. Tutan ah Chief Minister zapi lakhruak in Naypyidaw ah meeting an auh hna timi zong hi a diklomi a si ko lai. Dik sehlaw cu Chief Minister hi Vice President Henry Van Thio donnak ah kan sin ah a um ti hnga lo i Vice President khuallam zulh zong aa tim hnga lo” tiah Minister Pu Sui Thio nih a bia peh ah a chimchih.

Tomorrow News Journal nihcun, a luancia suimilam 19 (May 15 zan) ahkhan Chief Minister zapi Naypyidaw ah lakhruak meeting an auh hna. Meeting hi nihnih chung an tuah lai i meeting an dih in rian hmunhma i thlenremhnak zong a um lai tiah cozah lei bia theitu he aa naihniammi minung pakhat nih a chim ti in an thanh.

Meeting hi zeitik tuah ding timi an tial chih lo nain lakhruak a ti caah a dikmi a si ahcun nihin thaizing ah tuah colh ding a si. Sihmanhsehlaw, May 16 zingka suimilam 9:00 tiang ah Chin ramkulh Chief Minister Salai Lian Luai cu meeting kai aa tim lo tiah kan theih.

The Chinland Post nih Chin ramkulh Chief Minister le a PSO cu phone in pehtlaihnak kan tuah hna nain kan pehtlai kho lo. Cu hnu ah atu bantuk in Minister Pu Sui Thio sin in Chief Minister thutdirnak kong a tu bantuk in thawng kan theih hi a si.

Kan hnuzarh ahkhan media zong a si lomi social media facebook page group pakhat a simi Excellent News Agency nih ramkomh minister paruk le Chief Minister 3 rian phuah an si lai tiah thawngpang diklo a langhter. Cu chung ahcun Chin ramkulh in Chief Minister Salai Lian Luai an telh. Taningtharri ramthen Chief Minister hoihna cu a rian in atu te kha an phuah cang ti tiang in an tial. Hi thawngpang hi Kawlram media bochan tlakmi zei bantuk media hmanh nih an thanh in an tial lo. Asinain Excellent News Agency nih thawngpang diklo an tialmi cherhchan in Lai media tampi nih hechet thawnpang diklo an langhter cio tiah theih a si.

Vice President Henry Van Thio cu May 16-20 tiang hrawng Chin ramkulh, Tonzang, Cikha, Tedim, Rihkhawdar le Falam peng a tlawng lai. A biapi in lam le sul a vehvat lai. Tonzang le Tedim ah a riak lai i Falam le Hakha zong chikkhat cu a paltak khawh men tiah Chinram cozah upa pakhat sin in kan theih.

Vice President Henry Van Thio nih 2018 February 3-7 tiang ramkomh minister pakhat, ramkomh deputy minister pathum, ramkomh cozah zungpi in General Director le Director tampi he Chinram lam le sul an rak vehvat. Cu lio iahmotor lawngte in khan 600 renglo Chinram lam le sul a vehvat. Kalay-Falam-Hakha-Thantlang, Saisihchuak lam- Tio, Tikir, Hnaring, Matupi, Mindat le Kanpetlet tiang a rak tlawng. Zei dangdang bawmhnak lawng si lo in a tlawnnak pengkip sii-inn ihkhun chappiaknak zong a ngeih hna. February thla a rak tlun lio ah pengkip sii-inn ihkhun chappiak ding in bia a kamh hna pin ah amah a rak zulhtu ministry zung pawl nih a dangdang bawmhnak cheukhat zong an pek hna tiah kan theih.

About The Author

Na ruahning rak langhter ve.. (Leave a comment)

%d bloggers like this: