Chin ca (Hakha) Thanchonak Caah Phete Le Vompi Muitawn Zukcawl An Tuah Lio Pi A Si

Salai CungCung|2019 September 10| Chin Association Christian Communication (CACC) tawlrelnak in Hakha ah Vompi le Phete muitawn zukcawl cu Australia um Rev.Cung Hnin le Kyaw Kyaw @Ram Cung hna nih rak tlung in September thla chungin an tuah lio pi a si tiah kan theih.

“Hi muitawn zukcawl caah hin a thiam mi Australia ah Rev.Cung Hnin kan sawm, anih hi aw lei in a thiam mi a si, cun Computer muitawn 3D lei ah kan mah Laimi chung in a thiam tiah kan ruah mi Australia thiam in Kyaw kyaw @Ram Cung an mah pahnih hi kan cah hna. An mah nih hin thlakhat chung an um lai i Phete le Vompi tuanbia cu Laiholh tein an kan tuahpiak lai” tiah Pastor Lai Cung nih The Chinland Post ah a chim.

“Hi muitawn zukcawl cu kan thawk lio pi a si cang. Tu thla chung ah kan tuah lai i mizapi sin ah zeitik a phan te lai ti cu kan chim kho rih lo. Hi muitawn kan tuah hnawh channak a ruang cu, kan Laimi nih kan Laiholh tein muitawn hi chuak kho sehlaw ti hi kan duh, a ruang cu Mizo nih Mizo holh in muitawn an chuah tikah ngakchia nih an zoh nak in Mizo holh an thiam, cucaah kan mah Laimi chung in Laiholh he aa hlat cang mi hna le kan Laiholh kal ning cang a thei tuk lomi hna caah thathnemnak tampi a chuah pi lai tiah zumhnak kan ngei. Cun an mui zohnak in ngakchia ramkip ummi nih Laiholh an thiam lai, ngakchia sin ah Laiholh chim ti loin an zohnak in an thiam khawh cang lai. Tu chanah cauk tampi kan chuah nain a rel takmi an tlawm ngai, a sinain Vedio in kan tuah tik ah cun vawlei cung ngakchia le mino zapi nih an zoh te tikah kan Laiholh, kan Laica le kan nunphung tiang hi an theih deuh lai i thathnemnak mizapi sin ah a chuahpi lai tiah zumhnak kan ngei” tiah a chim chap.

Tutan ah Phete le Vompi kong a si i hmailei ah nunchimhnak kong a tawi tete tampi in Online le Youtube ah tampi chiah khawh an i timh. Cun ramdang Movie pawl zong a si khawh chung in holh leh in kan Laiholh tein zohkhawh ding in timh tuahnak an ngei chap. Cun Computer lei a thiam tak mi Kyaw Kyaw nih CACC zung ah September thla 10 in 14 tiang computer thiam duh mi le cawn duh mi um ahcun a lak tein CACC zung ah zaanlei suimilam 1 in suimilam 3 tiang mah le Computer te rak i put rak cawn khawh le Computer lei a herh mi hal khawh zong a si. Tutan cawnnak hi Australia um Adelaide Chin Christian Church(Australia) tangka lei bawmchannak le upa lei tanpinak in CACC nih a kalpi cuahmahmi rian a si tiah kan theih+++