Chin Cozah Le China Company Nih Chinram Peng 4 Ah Electric Tuahding In Biahrennak An Tuah
Tawk Tling Thang| 2019 July 1| Chin ramkulh cozah bu le China company nih Chinram peng 4 ah electric tuahding in biahrennak an tuahmi cu July 1 ah tuahmi Chin ramkulh hluttaw nih fehternak an tuah tiah kan theih.
Hi kong he pehtlai in MP Pu Van Thawng nih, “June thla chung ahkhin Chinram cozah bu le China company pakhat a simi Power Chinna International Group Limited nih Chinram peng 4 ah mini hydro electric tuah ding in biahrennak (MoU) an tuah. Cu biahrennak an tuahmi cu hluttaw ah an chuahpi i July 1 ah tuahmi Chin ramkulh hluttaw caanhman tonpumhnak ah hluttaw nih fehternak kan tuah” tiah The Chinland Post ah a chim.
“An tuahnak ding hmun cu Paletwa peng in Beedinwa, Matupi peng in Ruava Khuathar, Hakha peng in Buanlung le Timit, Thantlang peg in Ngaphaipi khua an si. Hluttaw nih fehternak kan tuahmi MoU biahren cu ramkomh ah chuahpi than a si lai. Cu hnu lawng ah a herhning in rian thawk te ding khi a si” tiah MP Pu Van Thawng nih a biapeh ah a chimchap.
Tutan hluttaw caanhman tonpumhnak ah Chin ramkulh 2019-20 budget chapnak tuahmi zong an fehter. 2019-2020 kum (BE) budget caah an fehtermi cu Ks. 164 billion renglo a si. Hi chung in budget an chapmi hi 17.28 billion a si tiah kan theih.
About The Author
