Chin Cozah Le Hluttaw Zung Nih Tial Cung Thang Upat Conglawmhnak Roca Le Ks. 600000 Laksawng An Pek

Tawk Tling Thang| 2019 March 13| One championship-MMA ah teinak a hmutu Salai Tial Cung Thang cu a chuahkehnak Chin ramkulh khualipi Hakha ah a tlung i Chin ramkulh cozah le hluttaw zung nih conglawmhnak Roca le ks. sing 6 (600,000) laksawng an pek tiah kan theih.

Salai Tial Cung Thang cu March 12 zingka ah Hakha a phan i khuami nih sunglawi ngai in an don i an puak.

“March 12 zanlei sang suimilam 4:00 tluk ah Chin ramkulh cozah zung mileng khaan ah Salai Tial Cung Thang cu Chin ramkulh cozah bu min in upat conglawmhnak Roca le tangka laksawng ks. sing 3 (300,000) kan pek. Hiti kan peknak cu One Championship-MMA i teinak a hmuhmi ruang le Chinram le Myanmar ram a cawisangtu le min a thattertu a si ruang ah a si. Amah pumpak hrimhrim zong ah Chinram a rak tlawn caah atu bantuk in kan pek hi a si. Upat conglawmh awk a tlak hrimhrim zong a si fawn” tiah Chin ramkulh chimnak nawlngeitu Minister U Soe Htet nih The Chinland Post ah a chim.

Cu bantuk in Chin ramkulh hluttaw speaker zong nih a dangte in March 13 chun, a zungkhan ah conglawmh upat peknak a tuah. Chin ramkulh upadi bawizik, Hakha khuanu/pa le hluttaw zung riantuantu tampi hi conglawmh laksawng peknak hmun ah an i tel kho.

“Salai Tial Cung Thang hi Chin miphun lawng si lo in Myanmar rampi min a thattertu le a kan cawisangtu a si ca le atu bantuk in teinak a kan hmuhpiakmi hi conglawmh upat awk a tlak taktakmi a si. Cu ruang ah Chin ramkulh hluttaw zung le Chin ramkulh upadi bawizik nih atu bantuk in conglawmhnak upat peknak kan tuah hi a si. Lai coat angki, conglawmhnak Roca le tangka ks.  sing 3 (300,000) kan pek” tiah Chin ramkulh hluttaw Speaker Pu Zo Bawi nih The Chinland Post ah a chim.

Tial Cung Thang le Camboadia pa Rin Saroth cu March 8, Yangon, Thuwana Indoor Stadium ah zan suimilam 8:30 ah a round 3nak tiang an i thua i mark relnak in Tial Thang nih a tei. Tial Cung Thang hi Chinmi chung in MMA ah a hmasa bik aa thuami le tuanbia thar a tialtu a si.

Chin ramkulh cozah nih conglawmhnak an pekmi

Salai Tial Cung Thang cu one championship-MMA i aa thuatmi ruang le teinak a hmuhmi ruang ah All Chin Society, Yangon le Chin National Front/Army (CNF/A) nih lawmhpinak roca an pek. Cun, Hakha a phak hnu ah Chin Youth Organization, Hakha zong nih conglawmh upatnak roca an pek ve tiah kan theih.

Chin ramkulh hluttaw Speaker nih conglawmhnak a pekmi

Tial Cung Thang cu March 12 zingka ah Hakha a phan i Khuanu khuapa nih siseh, CYO nih siseh, Khuathar mino nih siseh, chungkhat sahlawh nih siseh, Lai puan aihnak, lukhuh chinhnak, pangpar awihnak le conglawmhnak roca peknak tibantuk an ngeih cio. Henry Van Thio Parthlam cung ah kai in khuacuanhnak a ngei. Lai Innka lawng chung ah Lai nunphung laam in laampinak an ngeih. Cu hnu ah Khuacuanhnak Lai Innka Lawng in Khuathar a tlunnak inn tiang khan (meng) 4 chung an puak. Lai phung ning in nu lawng nih puak a si.

Hika ah Chin ramkulh hluttaaw zung ah Tial Cung Thang conglawmh upatnak an peknak video zoh khawh a si.

 

Salai Tial Cung Thang nih, “A si, one championship i teinak ka hmuh ah Naypyidaw ah Vice President Henry Van Thio he kanmah pahnihte lawng a dangte in biathlithup i ruahnak kan ngei. Thawng nan rak theih bantuk khan conglawmhpinak a ka ngeih taktak ko. Asinain, zei bantuk laksawng dah a ka pek i zei bantuk biathlithup dah a ka ruah timi cu chim awk a tha lo” tiah The Chinland Post ah a chim.

Tial Cung Thang a chuahkehnak cu Hakha Khuathar a si. A nu le a pa hi Pu Tawk Cem le Pi Mang Si an si. Unau chuakti khat pali an si i far pathum a ngei, amah lawng hi pa a si. 2005 kum ah Malaysia a phan. Cun, 2007 ah Syracuse, New York, USA ah an chunglingte in an phan. Hika ah high school zong a dih tiah kan theih.

Leave a Commnet

%d bloggers like this: