Chin Digest le NLD Party, Hakha Peng Mino Hruaitu Chungtel Isaac Bawi Za Lian Biaruahnak

0

Isaac Bawi Za Lian

Chin Digest Vol. 6, No. 4–

Chin Digest le NLD Party, Hakha Peng Mino Hruaitu Chungtel
Isaac Bawi Za Lian
Biaruahnak

 

Chin Digest (CD): Min, Khua, Cacawnak, hmuhton mi, atu dirpi mi party min, atu ṭuan lio mi rian hna tawifiang tein na kan chim kho hnga maw?
Isaac BZL: Isaac Bawi Za Lian, Thantlang peng Lungcawipi khua mi ka si. Yangon ah Law kum 4 nak ka kai lio si. Atuhi, NLD Party ka dirpi i, Chinland Sport ah ka ṭuan.

CD: Party tampi chung ah atu na dirpi mi party hi zeiruang bik ah dah na thim?
Isaac BZL: NLD hi ka ṭanh i ka dirpi. Hruaitu hi ka zumh i an kalpi mi policy zong ka uar fawn.

CD: 2020, thimnak caah nan Party mino cawlcanghnak theih kan duh ko?
Isaac BZL: Kan party mino cawlcanghnak tiah cun a tam pah ko. Atam pah ko caah a dihlak ṭial a har deuh lai. Mah lak ah ka duh bik cu khuate kip kan tlawn khawh tawk kan tlawn mi le Hakha ngakchia zohkhennak vialte ah cawlcanghnak kan ngeih mi hi kaa lunghmuih bik a si.

CD: Nan party mino cawlcanghnak ah buaktlak in mino zeizat hrawng dah an i tel kho?
Isaac BZL: 300 deng kan si nain cawlcangh taktak i a chuak kho deuh mi cu 100 hrawng kan si tawn.

CD: A luacia mi Ramkomh Kawlram Thimnak kan zoh tikah Mino cawlcanghnak kan hmu tuk lo. Tutan, thimnak ah hin mino cawlcanghnak hi a lumsa ngaingai. Khoika in dah ramkhel ṭhanghphawhnak a ratnak a si hnga?
Isaac BZL: Caan, chan le lungfimnak nih a kalpi ning in a si ko rua tiah ka ruah.

CD: 2020 Thimnak caah mino nih mah le pom mi party cio dirpi a si. Ruah ning le pom ning a kalh ngaingai. Hi nih hin thimnak dih hnu ah zatlang nun a buaiter lai maw asiloah a remh chin lai dah?
Isaac BZL: A remh chin deuh ding cu a si nain tuchan mino tampi bal party i lawh lo hi ral ah kan i ruat hna i zei dik lawh te hnga? A taktak cun kan i lawh lonak tu in kan ṭuan ṭi a herh i kan i bawmh a hau. Tu ning, mino dirhmun ning cun ka thei ve cia bak lo. Sinain a ṭha bik si hram ko seh.

CD: Nan Party Policy lakah na uar bik mi pathum in na kan chim kho hnga maw?
Isaac BZL: Tlangcung miphun kong le rampi remdaihnak, A dikmi democracy federal ramkomh dirh khawhnak, phunghrampi remh khawhnak ding(တိုင်းရင်းသားအရေးနှင့် ပြည်တွင်း ငြိမ်းချမ်းရေး စစ်မှန်သော ဒီမိုကရေစီ -ဒရယ်ပြည်ထောင်စု ဖြစ်ထွန်းစေမယ့် ဖွဲ့စည်းပုံ အခြေခံဥပဒေပေါ်ပေါက်ရေး ရေရှည်တည်တံ့ခိုင်မြဲ မည့် လုံခြုံဖွံ့ဖြိုး တိုးတက် ရေး) ti mi hna 3 hi an si. Kawlca in a tling fiang deuh ka ti caah ka rak ṭialnak a si.

CD: Nan party cawlcanghnak ah a chambaunak asiloah a ṭuah awk rian pahnih tein na kan chim kho hnga maw?
Isaac BZL: Kaa telnak a sau lo i a luancia kong ka thei lo. Kaa tel hnu in tutiang cu chambaunak ka hmu tuk lo. Kan tuah khawh tawk kan chei tawk cu a ṭha bik in kan i zuam hna. Mino aw an zong an ngai. Mino aw an ngaih hi kan pehzulhpiak hna seh ti hi ka duh bik si.

Chin Digest Vol 6, No. 4 A Phaw (Cover)


CD: Candidate aa cuh ding mi pakhat nih a tuah hrimhrim awk pahnih in na kan chim kho hnga maw?
Isaac BZL: Mipi he naihniam in an um thiam a hau. Aa naihniam lawng in a za lo an aw an he a cawlcangh thiam ve a hau. A ruang cu mipi nih thim mi an si. Anmah tein aa thim mi si lo tikah a thim tu aw an ngaih a hau tuk mi si.

CD: Atu na dirpi mi party hi tartlung tiang in ka dirpi ko lai tiah na ruat maw?
Isaac BZL: Ka fiang lo. Federal cu kan hmuitinh bik cio si i mah kan ngah hnu ahcun zei bantuk si te lai ka chim cia kho lo. Mah te uknak kan ngah cun kan miphun party hen ta kan si cio lai. Mah federal a kan kalpi kho ding party ahcun NLD hi ka zumh caah ka ṭanh zong hi a si fawn.

CD: 2020 Thimnak ah nan party hi mino cawlcanghnak nih zeitluk in dah a bawmh khawh tiah na ruah? Mino cawlcanghnak um hlah sehlaw, zei dirhmun dah an si hnga?
Isaac BZL: Mino le kan pa le kar pehtlaihnak a ṭha. Thil an tuah lai ah Hakha mino aw an zeidah lawh ti mi ruahnak hna a kan hal tawn. Cucu hmailei caah a ṭha mi rianṭuannak si hrim lai ka zumh. Mino um lonak cu zei party paoh an chambau ko lai. Cucaah mino um aa dan le dan lonak cu ka chim ti lai lo.

CD: 2020 Thimnak ah nan party nih teinak an hmuh ko lai ti na zum maw? Zeiruang ah?
Isaac BZL: Atu ning hin cun Party in zoh hau rih ko tiah ka ruah. 2008 an remh khawh hlan chung paoh cu acozah ser kho lo mi party minung na thim cun kum nga mipi an sungh pi ve ko hna lai. 2015 lio TT MP bantuk khan an si ko lai. Mipi nih an thim hna i an tling ko nain Hluttaw meeting lawng an kai ko. Thlakhat thlahlawh man cu an ei lai. Nain mipi cu cozah ser kho lo mi minung an pek tikah mipi cu kum 5 an sung ko. Chimrelpiak cu a fawi te nain tuahserpiak tu um lo cu a poi.

CD: Ramhun thimnak ah a minung le party kong ah hin ruahnak aa kalh ngai tawn? Nang, zeitin na pom ning a si?
Isaac BZL: Atu ning hin cun Party in zoh hau rih ko tiah ka ruah. 2008 an remh khawh hlan chung paoh cu acozah ser kho lo mi party minung na thim cun kum nga mipi an sungh pi ve ko hna lai. 2015 lio TT MP bantuk khan an si ko lai. Mipi nih an thim hna i an tling ko nain Hluttaw meeting lawng an kai ko. Thlakhat thlahlawh man cu an ei lai. Nain mipi cu cozah ser kho lo mi minung an pek tikah mipi cu kum 5 an sung ko. Chimrelpiak cu a fawi te nain tuahserpiak tu um lo cu a poi.

CD: A ra lai mi 2025 Thimnak ah candidate i cuh ve ding in timhtuahnak na ngei maw?
Isaac BZL: No. (ngei lo.)

CD: A donghnak ah mino le mipi cung ah 2020 Thimnak kong he pehtlai in biasiaherh chim na duh mi?
Isaac BZL: A bik in mino sin cah ka duh mi cu kan lungrang tuk tawn. Democracy chan a si tikah mah duhthimnak ngeih cio a si. Nang zong na duh mi. Anmah zong an duh mi. Cucaah i lawh lonak kha i theihthiampiak uh. Party dih in aa daw ding le aa kom ṭhan ding lawngte kan si philh hlah usih.

Cun Kan zapi sin cah ka duh mi cu,Ramkhel hi pakhat lawng in a si thiam lo. Pahnih kan si cun ruahnak aa khah ti lo tikah ramkhel ti mi hi a chuak kho cang. Mah ramkhel kong ah hin kan i lo kho dih lai lo. Mah kan i lawh lonak kha, khat le khat, sangkhat le sangkhat, khuakhat le khuakhat, i dohnak le i huatnak siter loin kan i lawh lonak cio in ṭhat lonak kha hmunkhat ah doh ṭi hna usih ti zong kaan sawm chih hna. Cun kan mee pakhat te nih ram a thlen khawh ti mi hi philh hlah usih. Cucaah kan ṭanh mi party cio ah mee rak thla cio hram uh ti sawm bu in ka bia ka donghter, kaa lawm.


Chin Digest Vol. 6, No. 4 (November 2020) ah chuah mi a si. Cauk a phanh khawh lo nak a tam caah Online in thazaang a kan petu caah kan rak thlah ṭhan mi a si. ~ Editor

About The Author

Na ruahning rak langhter ve.. (Leave a comment)

%d bloggers like this: