Chin Hlasak Thiam Van Dawt Cin Le Daniel Mang Hram Lian Tin Thei An I Thium Lai
City Hunter| 2018 March 11| Kawlram hlasak zuamnak Melody World ah pahnihnak a rak co balmi Chin hlasak thiam Van Dawt Cin @Khin Moe Wai (Moe Moe) cu March 17 ah pasal a ngei cang lai. Moe Moe nih zeibantuk hlaphel pawl dah aa chuah cang, timi na hngal ve cang maw? Anmah pahnih konglam le anmah pahnih hmanthlak pawl hun rel le zoh khawh an si.
Van Dawt Cin @Moe Moe cu March 17, Yangon ah Australia ah a ummi tlangval Daniel Mang Hram Lian Tin Thei he thitum kutsih thlacamnak an tuah cang lai. Daniel Mang Hram Lian Tin Thei hi Kalay, Tahan um Pu Nein Chan (tleicia) le Thantlang peng, Leitak kuami Pi Sun Cuai (tleicia) hna i an fapa a si. Amah hi Australia ah khua a sami a si. Thitum thlacamnak cu 2018 March 17, zan suimilam 6:00-9:00pm tiang Gandamar Grand Ballroom level-3, Mayangone Township, Yangon ah an tuah lai.
Moe Moe cu an chungkhar ning in Yangon ah khua a sami an si. Amah hi Thantlang peng, Thau khumi Pu Thawng Ling (tleicia) le Thantlang peng, Saikah khuami Pi Zung Len fanu a si. Unau chuakti paruk lakah a palinak a si.
Moe Moe hi Kawlram pumpi huap in rak tuahmi Melody World 2009 hlasak zuamnak ah pahnihnak a rak comi Chin hlasak thiam a si. Kawlram pumpi huap in tuahmi hlasak zuamnak ah teinak a rak ngah hmasa pawl a si. Cuti teinak a rak ngah hnu cun Kawlram le Chin miphun sin ringawn lamthluan ah biatak te in min ngeih hram a hung i thawk.
Moe Moe hi amah pumpak (single album) hlaphel pathum aa chuah cang. Cu hna cu; Lai zuunhla “Lungkil Dawtmi”, Pathian thangthatnak hla “Zumtu Rian” timi le Kawl zuunhla (Kawl hla in) “အခ်စ္လို႔ထင္တဲ့ အေတြး” timi an si. Cun, hlasak thiam KKT he “မူပိုင္” timi pahnih (deut) hlaphel zong aa chuah fawn. Hi lawng si lo in a phu le hawi dangdang he lai hlaphel siseh, Kawl hlaphel tampi aa chuah fawn.
Moe Moe cu hla lei ah Chin mizapi nih kan i bochanmi hlasak thiam pakhat a si. Anih he Lai hla lawng si lo in Kawl hla zong tampi aa chuah i a sa. Chin miphun puai sunglawi le concert tibantuk ngeihmi ah an sawm theu lengmang. Chinram ah siseh, Mizoram ah siseh, Kawlram hmunkip ah siseh, Malay, US le Australia tibantuk in hlasak an sawm i a sa lengmang tiah kan theih.
Moe Moe nih thitum thlacamnak an tuah dingmi kong ah a facebook in sawmnak in a tuah. Hmunkip, kakip um hawikom, chungkhar vialte nih nan kan telpi cio naklai kan in sawm hna tiah a facebook cahmai a tial.
Photo Credit: Van Dawt Cin facebook
About The Author
