Chin kokek Party Vs Kawl minung nih hruaimi Party
Catialtu; Cung Dawt
By; Salai Cung Dawt
Kawl miphun nih an huat ngaingai tiah ka ruahmi cu mah miphun le ram kong ah miphun dang vai rawlh vai sawm i ramchung ramkhel kong le thanchonak hnorsuan, aukhuan ti hna hi a si rua tiah ka ruah.
Cucu Kawl ralkap cozah chan ah faktuk in renghnak ah an kan hman mi cu “Pyi-tuh-Tabaw-ttha” timi tlangtar in zulhphung bantuk Kawl miphun caah an ser.
“ျပည္ပအားကိုး ပုဆိန္ ရို” (Pi-pah-Aa-Ku-Pahsing-Zu) an ti i Kawl ram a himnak, an nunphung, biaknak le caholh, ramkhel zalonnak an hmuh khawh nakding ah tiah Kawl mipi zulh awk in an chiah.
Hi zawn te ah keimah fian ning in cun –kan kong lam cu kan mah tein kan chim ve awk a si, kan ram caah kan miphun nih ttuanvo ngei ko usih. Miphun dang thazaang, ruahnak bochan in sal bang in kun ti loin, phundang in chim ahcun Lai phungthluk nih “Mi kut in rul tlaih” timi bantuk in ka lungfian ning a si.
Ka chim duhnak cu Chin miphun zalonnak, mah te khuakhan lairelnak, kan ram sersiam tthan nak le thanchonak tbk. vilate ah Kawl minung nih a ukmi Party tangah kun, an nawl zulh lengmang le an Party ah ruahchannak pek lengmang i timh hi a si.
Cun a tang lei ah an tial rih mi cu (Kawlca khi Lai biaholh in ka leh tikah ka Laiholh nih a tlinh lo kho, nain ka chim duhnak nih cun a khen ko men lai)
* Rampi daihnak, thanchonak a hnorsuang tu, a hrawktu cu dohdarh hna ding
* Rampi kan kong lam ah hnahnawh nak, buainak in a rak chuah tertu ramdang minung pawl dohdarh hna ding
* Ramchung, ramleng in leirawinak an kan tuahtu cu kan ral nganbik (Common enemy) an si tiah an langhter.
A cung cabia hna hi Kawl minung, Kawl uktu bawi pawl nih Kawl nunphung, caholh le biaknak, a ram a him khawhnak ding ah zulh ding in a sermi a si.
A si le Chin cu Kawl kan si maw timi le Union of Burma kong ah ka fianning cu;
Kawl kut tang i kan luh hlan ah Chin miphun cu nunphung, cabia tling he mah tein aa uk mi, kan Chin ram te cu a ho hmanh nih rak pen lomi kan si. Panglong biakamnak in Union of Burma a dirh vemi lawng kan si. Union of Burma ah ifonh hna usih ti a si nain, Chin kha Kawl timi ah kan thlen lai an ti lo. Asinain, tuni ah cun Union of Burma a dirhtu kan rak simi cu a dirhtu ah an kan ruat lo, zeitik hmanh ah an kut tang in chuak kho ti lo ding tu in an kan hren.
A si ahcun, Kawl minung le uktu pawl nih an caholh, nunphung le biaknak an pennak ram a him khawh nakding ah zulhphung an ser mi khi, Chin miphun nih kan mah le kan ram, kan miphun himnak caah tiah kan mah hrang ah translate i tuah ve tuah usih–Chin mi kan ral nganbik cu a fiang colh ko cu mu.
Chin miphun kan zalennak, mah tein khuakhan lairelnak an kan chut tu, kan ram thanchonak, nunphung, zatlang nun le caholh a hrawktu, kan biaknak namnehtu cu a hodah an si? Kum(70) leng Kawl uknak tangah Chin miphun cu kan um cang. Sal bantuk in an rak kan hrem, mithmuh kut-tongh a tampi, pumpak in kan tuarnak tial ahcun a tamtuk lai. Cu ruang ahcun kan pale mifim, cawnnak sang le sinak sang, limhang puitling he a tthudir mi University student pawl, kan pale mifim tampi nih hriamtlai bu in ramtang ah an luhnak le CNF in an dirnak zong a si. Kum 30 leng Meithal in an doh ve nak a ruang cu chim cawk lo a si.
Chin miphun le Chin ram nih zalennak, mah tein khuakhan lairelnak kan khel nak ah siseh, Chin miphun thanchonak le a hmai lei kong cu kan mah tein aa tawlrel ding kan si ve,
Chin ram tawlreltu ding ah Chin miphun cu Chin ram ah hrin kan si
Kawl minung, Kawl party tangah kun loin, kan duhmi a tlinnak ding ah ttuanti hawi bantuk tu in kan ser hna awk a si. Kan hmuitinh cu Chin minung, Chin party nih felfai tein kalpi uhsih law, daihnak, remnak a duh vemi miphun dang party an um ahcun ttuanti hawi ah ser hna usih, an ke taang ah kun loin, an khuakhan mi kip ‘yes’ pek in an sal bang an tang ah cawlcang loin, cabuai pakhat ah miphun sinak puitling, miphun sinak limhang puitling, Chin ram caah, rampi caah khuakhang nak dirhmun, tlukruannak in Lairel khawhnak lam hi kan ngei ve lo maw?
Editor biacah; A cunglei cabia cu catialtu nih amah pumpak ruahnak he a tialmi a si.
About The Author
