Chin Kum Thar Cu October Thlapa Lai Cacawn Ningani Ah Tuah Kho Seh Tiah Cathanh An Chuah

The 2nd New Year Celebration/ CIANUSA fb

Salai Josephbawi| The Chinland Post| 2019 October 14| Washington DC/ Maryland um The 2nd Chin New Year Celebration (Chin Kum Thar Puai 2019) le Seminar cu Chin Integration and Advocacy Network, USA (CIANUSA) hrihawhnak in October 11-12, 2019, Oakland Mill High School le Reservoir High School ah sunglawi ngaingai in tuah a si i Seminar biafunnak in Chin Kum Thar cu October thlapa lai Ningani ah tuah siseh tiin bia an chah tiah theih a si.

Chin kum thar kong Seminar ceihhmainak cu US um Pu Lian Uk le Pu Lian Cin, Rev. Dr. Chan Chum Hei, Chin ram lei in Rev. Dr. Za That (CACC GS) le Pu Lalawm Puia (Hakha Post-Chief Editor) hna tel in ngeih a si. CIANUSA dirtu le Executive Director Pu Zo Tum Hmung caan a tlai. October 12, 2019 Chin Kumthar puai caan ah New Zealand in hlasak thiam Mai Van Hlei Sung sawm a si lengah Chin thilthuam hmuhsaknak, Lairawl, Lai lam le Lai paih tbk an tuah i Chin kumthar kong he pehtlai in Maryland Governor, Larry Hogan zong nih lunglawmhnak roca a kuat hna. Lai Paih zong an tuah i zuamcawh paih ah Tv. Uk Ling Thang nih bual a co i, Tv. Van Mawng nih Zatlang bual a co tiah theih a si.

The 2nd New Year Celebration

Hi kong he pehtlai in “Chin Kum thar hi Hakha in ‘Tho’, Falam in Fanger, Tedim in ‘Khuado’ tbk tuah cio a si nain 1949 ah Chin Affairs Council nih October thla 26-28 tiah bia a rak chah ning te khan Chin kumthar timi hi tharchuah than usih law hmailei miphun pakhat ah ipehtlaih thannak caah bawmtu le a sunglawi tukmi kan miphun puai a si lai. Chin Kumthar tiin rak chah cangmi hi Chin State Hluttaw nih kan fehterpiak than hna sehlaw tihi kan duh. 2020 ahcun Ramkip Chin upa siseh, Cozah lei zong siseh sawm in hlunghlai taktak in Hakha ah tuah siseh. Cun, Chin Kumthar zungkhar ni (Chin Public Holiday) tiang in kan cohlanpiak kho hna seh tihi saduh thahnak kan ngei. A voi 2nk Chin New Year Celebration 2019 i Seminar nih Chin Kum Thar (Chin New Year) cu October thlapa lai cacawn ningani ah tuah kho siseh tiah hnatlaknak kan ngei I cathanh kan chuah” tiah CIANUSA Executive Director Pu Zo Tum Hmung nih The Chinland Post ah a chim.

USA Maryland State hrambunh CIANUSA cu US Cozah Reg. 501(c ) (3) in NGO pakhat a si i Maryland a ummi Chin khuatlang thanchonak, Chin nunphung kilven le tthanchoternak, hruaitu tthan an chuah khawh dingin bawmhchanh le Malaysia le India ah atang rihmi Chin refugees hna caah cawlcanghnak le US um Chin mi hna hmun khat tein rian an tuanti khawh I US mibu ah santlaimi sidingin dirhmi zatlang bu a si. US Cozah nih Chin ralzam 2020 ah a lak khawh rih nak hnga le tam deuh in an kan lak khawhnak hnga caah tiin Malaysia Refugee zung ah siseh, Washington um Chin upa hna he ibawm in August 2, 2019 ni ah US State Department rianngeitu zong a ton hna tiah theih a si. Chin Kumthar asilo ah Hakha nih ‘Tho’, Falam nih ‘Fang Er Puai’, Tedim nih ‘Khuado Puai’, Hualngo nih ‘Mim Kut’ tbk cu thlaithar kan zun, kan lak cang timi le tleicia pupa hna philhlo thlacamh timi hlanlio Chin pupa hna zumhning in mah le phun tengnge min ngeihmi hoih in October thla dongh lei zarh ah tuah cio a si. +++

 

Leave a Commnet

%d bloggers like this: