Chin le Rakhine ramkulh ah mipi ningcang loin thahnak le kahdohnak ngol colh ding in ramchung ramleng bu 139 nih cathanh an chuah

Chin Human Rights Organization (CHRO) le Progressive Voice (PV) tlangtlaknak in ramchung ramleng bu 139 nih Chin le Rakhine ramkulh ah kah dohnak rianrangte in ngolh ding ah le ningcang lo in mipi thahnak (War Crime) tuah lo ding halnak cathanhnak cu April 15 ah an chuah.

Cathanh a tuahmi ah ram 25 fai in zatlang bu le nuhrin covo bu an i tel i Chin le Rakhine ramkulh ah AA le Kawl ralkap nih kahnak ngolh colh ding ah le ningcang lo in mipi thahnak (War Crime) tuah lo ding ah ramkip cozah le ASEAN cozah phu nih tlangtlak ding cathanh an chuah hi a si.

An cathanh mi ah, “AA le Ralkap kah dohnak ah UN nih ralram ah mipi vennak le humhimnak he pehtlai in (UN Security Council Resolution) biachahnak 1265 le 1296 an buar. A luancia ni 30 chung ah Chin ramkulh ah mipi hmuitinh in ralkap nih kahnak a tuah i minung 30 an nunnak a liam cang,” tiah an tial.

UN Security Council Resolution 1265 le 1296 hna nih “ral i tuknak a um tikah aho ralkap hmanh nih mipi hmuitinh in kah lo ding, a sual lomi mipi thih lonak, harnak pek lo ding le humven ding” hi UN chungtel dihlak nih zulhding ah hnatlaknak le biachahnak an tuahmi a si.

AA le Kawl ralkap kahnak ruang ah 2018 kum in nihin tiang Chin le Rakhine ramkulh chung ah ralzam in umnak ngei lo minung 150,000 an um cang tiah cathanh an tuahmi an an tial chih.

Hi zatlang bu 139 chung ah ASEAN in MP pawl i funtom in nuhrin covo rian an tuantinak bu ASEAN Parliamentarians for Human Rights le Asia ram ah nuhrin covo bu nganbik a si mi Asia Forum for Human Rights timi Forum Asia bu zong an i tel.

AA le kawl ralkap kahnak ruang ah nihin tiang Chin mipi dihlak 10,000 renglo ralzam in an khua an tlik tak i Paletwa, Sami le Paletwa khua pawng hmun dangdang ah an i dor hna.

Hi cathanhnak kong he pehtlai in CHRO in chimnak nawl ngeitu Salai Sang Hnin Lian nih, “Chin ramkulh ah Paletwa peng cu innlo le lamsul a chiat bik nak peng a si. Cun Covid-19 pulrai a chuah lio a si chinchap ah Internet le pehltainak ralkap nih an phih ruang ah zeihmanh thawngpang an thei kho lo i cawphrup in an thudir. Cun lam le sul zong an phih dih caah eidin bawmh khawh zong an si lo i eidin ah harnak tamtuk an tong. A bu in an i dor, Covid-19 hna a chuah tikah tihnung tuk dirhmun ah an thudir. Hi bantuk caan lio ah kahdohnak tuah le ral i tuk hi minung sinak in tuahtonak tha lo taktak a si. Hi bantuk tuahtonak kan duh lo caah ramchung le ramleng bu 130 renglo i komh in kahdohnak rianrangte in ngol ding ah le ramkip cozah le ASEAN telh hna tlangtlak ding ah cathanh an chuah hi a si,” tiah The Chinland Post ah a chim.

Chin le Rakhin ramkulh ah a cawlcangmi AA ralkap phu cu NLD cozah nih phungning lo in mipi thahnak, mipi thil fir piaknak le hnahnawhnak an tuah a tik caah ralhrang (terrorist) phu cazin ah min a khumh hna.

Cozah nih AA ralkap ralhrang cazin ah a khumh hnu in AA sin ah phone in siseh, Internet in siseh pehltaihnak a tuahmi Media le Journalists cheukhat zong ralkap nih taza an cuai hna tiah kan theih.