Chin Media Phu Nih Chinram Cozah Chuahmi Thawngthanhca Ngol Ding In Cathanh An Chuah

0

The Chinland Post| 2018 February 28| Chin Ramkulh Cozah nih Sipin Minister Salai Isaac Khen tlangtlaknak in an chuahmi thawngthanhca, Taungzalat Times ngol ding le zalongte le a caanhmaante in Chin media pawl thawngpang (information) pek ding in Chin Media Phu (Chin Media Network_ CMN) nih cathanh an chuah.

Cu cathanh an chuahmi cu a tanglei bantuk in an langhter.
(1) Thawngthanh (Media) rian timi cu cozah pakhat i a rian a si lo bantuk in tu ah rampi tangka hmang in chuahmi Myanmah Alinn le Kye Mone thawngthanhca te pawl hmanh an ngol ding a si cang tiah a zalong mi thawngthanhtu phu hna nih an soisel lio ah Chin Ramkulh Cozah nih rampi tangka hmang in thawngthanhca an chuahmi cu CMN nih fakpi in kan doh.

(2) Cozah tlaihmi Media um awk a si lonak le Media timi zumhning, ruahnak, pomning pawl karhzai ternak hriamnam pakhat bantuk in hman awk a si lo nak, a hlan cozah chan ah NLD party lutlai pawl nih an rak doh zungzal mi NLD Party dirhmun pakhat bantuk a rak simi kha nihin Chin Ramkulh Cozah nih a upat awk a si tiah CMN nih kan ruah.

(3) Chin Ramkulh Cozah nih tu bantuk in thawngthanhca chuah ve siloin Media pawl nih zalong tein thawngpang kha a caan lio te ah fawi tein an lak khawh nak ding thawnglatu pawl caah zalonnak a sersiampiak awk tu a si deuh. Cu leng ah a hlan ah online cung in an rian tuanmi kong thawngpang a thanh tawn bantuk khan tuah ding ah tuanvo a ngei.

(4) Cozah pakhat nih thawngthanhca chuah cu Democracy hruaining i a thawtnam taktak, suttung palinak a simi Media tha a pek lo a si i a zalong mi Chin Media pawl a cohlan lo le a upat lo zia zong a langhter. Cu leng ah a zalong mi Media pawl kha an herhmi thawngpang pek ding ah Cozah leikap in thazaang dernak tampi a um cang lai.

(5) Ramkomh Myanmar ah a thangcho lo bik a simi Chin ramkulh chung ah thanchonak rian tuan awk a tampi ko lio ah tu bantuk in Chin Minister pakhat nih tuanvo lak le rian dang pakhat i chiah in a tuah awk a si lo tiah CMN nih kan ruah.

(6) Tubantuk thawngthanhca chuahnak in Chin Media pawl nih zalong tein thawngpang kan lak khawh nak ding tu Democracy zulhphung he aa tlak ning tein tawlrelpiak ding ah tuanvo a ngei.

(7) Cozah pakhat nih thawngpang tial awk caah theih kan herhmi pawl pek ding tuanvo nganpi a ngei i tu bantukin amah nih thawngthanhca chuah hi a herhmi a si lo caah Chin ramkulh cozah nih an chuahmi Taungzalat Times thawngthanhca hi chuah ti lo ding in CMN nih fakpi in kan doh i thawngtheihternak cathanh kan chuah.

CMN chungtel hna cu Sagaing ramthen, Kalay Hotel GBH ah February 25 ahkhan tonpumhnak an ngei. Cu tonpumhnak ahcun Chin ramkulh Sipin Minister Salai Isaac Khen hruainak in Chin ramkulh cozah nih Taungzalat Times journal cu thlakhat voikhat in chuah hram an thawkmi cung ah atu bantuk in Chin media phu hna nih cathanh an chuah hi a si.

Taungzalat Times ah tuanvo latu ding upa hna cu, CEO- Sipin Minister Salai Isaac Khen, Admin-U San Htun Sein (Chin Ramkulh Cozah Director), Advisor Editor-U Kham Lian Sun (Pianciayee ramkulh lutlai), Advisory Board-U Khin Mg Kyaw (Chin ramkulh cozah phu Secretary) le Dr. Run Bik, Chief Editor-Htun Awi, In Charge Editor-Hnin Si Thakhin, Editor-Toe Nay Chi, Art Advisor-Way Luh Kyaw le Tu Htoo San, Distribution tlaitu-Salai Martin Tuang le Pum Khanh Nuam, Design- Watung, Computer catialtu-Salai Glory Moe, Staff-U Yaw Minn Htun, Daw Ding Chianh Hoi, U Shan Do Sang, Printing-Tingtan Oo Printing hna an si.

CMN ah chungtel phu 18 an um. Hi phu 18 cu cozah nih cachuahnak nawl pekmi registration a ngeimi lawngte an si. Cu hna cu; The Chinland Post, The Hakha Post, Khonumthung, Chin World, Chin Thuthang, Tahan Times, Matupi Times, The Chin Times, Chin Voice, Chinland Herald, Zomi Times, Zomi Post, Zolenghte, 13 Tedim Post, Tongsang Media, Kcho Post, The Chin Journal le Lairawn Post an si. Hi chung ah catlap in thawngthanhca a chuah ti lomi hi Tahan Times le Kcho Post an si. CMN cu 2014 in thawkmi Chin Media pawl funtomnak phu a si.

About The Author

Na ruahning rak langhter ve.. (Leave a comment)

%d bloggers like this: