Chin Mi Minung 82 AA Hriamtlai Nih An Tlaih Hna

TCP-Thantlang|2019 Tho 28|Paletwa peng um Chin mi, Kin-ta-lin khuate, Thar-ya-kone khaute le Kha-maung-Uah khua mi minung 82 hna cu AA hriamtlai hna nih an tlaih hna tiah Chin ramkulh cozah tuanvo ngeitu nih a chim.

Hi cazin cu Ramkulh palek zung le penguk zung cazin hna zohchih in chimphuan mi a si i cuchungah Kha-maung-uah khua tein ralzam minung 69 zong AA nih an tlaih mi hna chungah an i tel.

Paletwa kiangkap ah cun Kawl ralkap le AA hriamtlai lawng an um, a tlau mi hna hi Kawl ralkap thiltuah mi a si lai lo pin ah AA thialtuah mi lawng te an si ko lai. AA nih Kin-ta-lin khua mi 54 an tlaih cang hna pin ah 8 zong an tlaih chap hna. Cupin ah Rakine ram lei zongah meitahnak zung riantuan minung 31 hna zong an tlaih mi hna hmuh tikah hi zong hi AA thiltuah an si ko lai.” tiah ramkulh cozah chimphuannak nawl ngeitu vuanci U Soe Htet nih a chim.

Chin ramkulh cozah nih Paletwa peng khuami a tlaumi hna cu NRPC sin October 21 ni ah chimphuannak a tuah. NRPC cu tlangcung hriamtlai phu hna he neihniam tein riantuan mi an si tikah hi thil cu an kan tuah piak khawh lai zong zumhnak ka ngei tiah a cunglei upa nih a chim.

Paletwa peng khua mi an tlau nak kongah Chin ramkulh cozah nih AA thiltuah mi an si timi kongah AA hriamtlai chimphuannak nawl ngeimi Khaing Thu Kha nih AA thiltuah mi a si lo tiah a chim ve.

“Chin ramkulh lei ah kan mah hna nih khuami hna cu mizei hmanh kan tlai ti hna lo. An tlaih hna an kan ti mi hi an kan zumh lo caah an kan puh sawhsawh mi a si. Minung pakhat hmanh kan tlaih mi hna an um lo.”tiah a AA lei nih an chim.

Cozah thlannak (Revolution) kan tuah na ti ah cun sualnak ngei lo mizapi nan kan hnursuan awk a si lo.” tiah Khumi (Chin) hruaitu upa U Kyaw Neing nih a chim. (Ref: RFA)