Chin miphun a tlaumi 18 kong ah UN he pehtlai in kan cawlcang cuahmah: Salai Za Uk Ling

Salai Tluangkipthang — Kan hnu August 30 ah Chin miphun nuhrin covo kilvengtu phu (Chin Human Rights Organization) nih Kawl Ralkap le Arakan Army (AA) hna kahdohnak ruang ah a tlaumi, tlaihkhihmi le an umnak hngalhlomi Chin mi 18 kong ah an sining le a tlaihkhimi hna a si ahcun, thlah ding le an kong mizapi sin theihternak tuah ding ah cathanh an chuah.

Hi cathanh kong he pehtlai in a tlaumi, tlaihkhihmi le an umnak hngallomi hna kong ah United Nations (UN) lei nih CHRO cu pehtlaihnak an rak tuah hna tiah theih a si.

Hi kong he pehtlai in, CHRO Deputy Executive Director Salai Za Uk Ling nih, “UN Working Group on Enforced Disappearances hi cozah si seh, cozah a si lomi hriamtlai phu pawl nih mi an tlautermi (an tlaihmi) hna hlathlaitu le an sining (case) tawlreltu an si bantuk in CHRO nih anmah he naihniam tein i chawnhbiak le rianttuan tti kan i tim. A tlautertu, a tlaitu hna sin in thawngpang kan theih khawhnak caah a biapi ngaimi duhnak langhter in namnak (pressure point) a si fawn tiah The Chinland Post ah chim.


Vawleipi ram 193 fonhnak phu United Nations (UN) nih ralruang ah siseh, uknak le nawlngeihnak he pehtlai in, a lotlaumi hna kong he pehtlai in cozah sin ah pehtlaihnak tuah in, an luat khawhnak hnga ding caah tawlreltu UN Working Group on Enforced Disappearances tiah an dirh. Amah (UN WGED) nih cozah he pehtlai in an tawlrel tawn i, ramdang cozah pawl sin ah ruahnak le nawl zong an pek tawn hna.

2015 March thawk in Kawl Ralkap le AA an i kahdohnak ruang ah Paletwa peng ah Chin miphun 17 le Rakhine ramkulh ah Chin mi pakhat, an zapi 18 an tlau tiah CHRO nih August 20 cathanh chuahmi in theih a si. #

Na ruahning rak langhter ve.. (Leave a comment)

%d bloggers like this: